Despues di 12 aña AZV y HAVA ta firma contract nobo y ta ahusta tarifa pa dokternan di cas

Ayera durante un conferencia di prensa organo ehecutivo Algemene Ziektekosten Verzekering (AZV) y Huisartsen Vereniging Aruba (HAVA) a firma, despues di 12 aña, un contract nobo pa trece cambio y mehora e structura di prome liña di cuido, e dokternan di cas.

Minister demisionario di Salud y Turismo, Dangui Oduber, a splica cu aña pasa den luna di juni ministerio di Salud conhuntamente cu tur stakeholder den e sector di cuido di salud na Aruba a firma un acuerdo di cuido, e ‘Zorgakkoord’ den cual ta delinea kico ta e prioridad- y necesidadnan di cuido medico pa Aruba y a yega na palabracionnan concreto cu un plan di accion.

Den e acuerdo aki, el a sigui splica, a wordo palabra cu lo reforsa e prome liña di cuido. Esaki tabata un prioridad no solamente pa e dokternan di cas, si no tambe pa henter e sector y ta un di e puntonan di atencion. Cu e acuerdo di cuido a tuma accion necesario pa aumenta dokternan di cas, a percura pa busca mas praktijkondersteuners, a cuminsa cu e curso di dokter di cas na ImSan y a haci inversionnan necesario pa reforsa e prome liña di cuido.

E mandatario a resalta cu un punto di atencion tabata e acuerdo cu dokternan di cas. Pa mas cu 12 aña e tarifa di dokternan di cas no a wordo ahusta. E negociacionnan mes a cuminsa na aña 2020 den pleno pandemia y minister Oduber a remarca cu no tabata negociacionnan facil y cu hopi reto. Despues di cuater aña di negociacion finalmente a logra yega na un acuerdo.

El a splica cu e meta di contract ta pa yega na un compensacion mas balansa pa e dokternan di cas, mas tempo cu e dokternan di cas ta bay duna na e pashentnan y un miho disponibilidad y accesibilidad.

El a agrega cu prome cu a yega na e punto di firma e acuerdo nobo AZV a traha un rapport a base di un estudio realisa y a base di e resultadonan aki a percura pa hinca un contract nobo den otro.

E contract nobo, e mandatario a destaca, ta percura pa e dokternan di cas tin un compensacion mas husto pa tur e servicionan cu nan ta brinda, pero tambe pa e dokternan di cas por ofrece un miho nivel di servicio.

El a splica cu antes e pago di dokternan di cas gran parti tabata basa riba e cantidad di pashentnan cu e dokternan tin, un suma fiho. Aworaki esaki a wordo cambia y ta introduci un tarifa mas halto pa pashentnan riba 60 aña, e tarifa pa consulta ta subi, pero na mesun momento, el a subraya, e tarifa ta subi y ta mara na mas productividad di parti di e dokternan di cas.

Pa loke ta trata e retonan, Bon Dia Aruba a puntra cual tabata e retonan mas grandi cu nan a enfrenta durante e negociacionnan. Director di AZV, Edwin Jacobs, a splica cu e negociacionnan a cuminsa den aña di pandemia y negosha algo cu lo por tin un impacto financiero den un pandemia tabata dificil. E momento ey caba tabatin un recorte di 5.5% y no tabata sa pa cuanto tempo e ta bay ta. “E negociacion ey no ta bay great ni cu harimento, e ta bay cu hopi tension,” el a destaca.

Jacobs a sigui splica cu na momento cu e recuperacion a bin ta momento cu nan a cuminsa papia di e cambio di structura di compensacion, cual el a resalta tampoco no a bay hopi facil pasobra e ta trece incertidumbre y cada partido mester haci nan esfuerso pa convence otro cu e formula na unda a yega ta un formula cu ta bay traha tambe.

“Cu nos a yega unda AZV kier yega, no. Pero cu nos a keda unda HAVA tabata desea tampoco. Tabatin movecion di ambos banda caminda aworaki tin un tarifa fiho di 60% di e totalidad, un parti cu ta depende di produccion y tambe un parti cu ta depende di reconocimento di trabou,” el a agrega.

El a menciona como ehempel cu aworaki nan ta stimula pa na momento cu pashentnan ta den fase terminal, door di un tarifa diferente, e dokter di cas ta bay atende cu pashent na su cas.

El a remarca cu e negociacion pa cambio di structura di e tarifa a tuma su tempo pa e partidonan por a compronde otro bon y cu e contract nobo tin un structura cu tur dos partido por ta contento cune.

Jacobs a resalta cu nan tin expectativa cu e ta bay duna e aseguradonan miho entrada na dokter di cas, nan por usa diferente medio pa yega dokter di cas y tocante e contestamento di telefon, cual el a remarca ta un keho grandi, tambe ta bay tin mehoracion.

Dr. Joaquin van Trigt, presidente di HAVA a indica cu e retonan hopi biaha tabatin di haber cu confiansa. El a splica cu HAVA tabata kier pa AZV compronde e trabou cu ta encera pa ta un dokter di cas, no solamente wak e pashent pero tambe e tempo cu ta bay den management, traha verwijsbrief, por ehempel, cu talbes ta cosnan cu no ta visibel pa pashentnan ni pa AZV.

Bon Dia Aruba a puntra dr. van Trigt si cu e contract nobo ta yuda alivia e presion cu e dokternan di cas tin, mirando cu den pasado HAVA a yega di expresa nan preocupacion pa e cantidad di pashent cu cada dokter di cas tin y e presion cu esaki ta trece cune.

El a splica cu efectivamente e trabou ta bay bira menos pisa, pero e no ta bay bira menos. E contract aki, el a indica, ta trece trankilidad den e sentimento cu nan ta wordo compensa mas hustamente pa e trabou cu nan ta haci.

“Esey ta mas tanto loke ta e parti esencial di e contract. Tin diferenciacion aworaki y nos tin e sentimento cu pa loke nos ta haci cu ta wordo compensa di un miho forma den e contract nobo. Pero e trabou di dokter di cas ta keda un trabou basta dificil y pisa pa atende cu tur e pashentnan,” el a remarca.

Dr. van Trigt a resalta cu nan ta spera di baha e cantidad di asegurado pa praktijk toch significantemente pa nan por dedica mas tempo pa cada pashent den e praktijk. “Esey ta duna nos e satisfaccion di e trabou cu nos a scoge p’e en bes di tin extra stress tocante cosnan cu nos no tin control y ta afecta e calidad di cuido negativamente,” el a subraya.

Director di AZV, Jacobs agrega cu e cantidad di ora cu e dokter di cas ta keda dedica na e pashentnan ta keda mescos, solamente cu como AZV nan a tuma cierto paso, entre otro aumenta e cantidad do praktijkondersteuners di 24 pa 36.

El a indica cu tin dokternan di cas cu no tin praktijkondersteuners y sector di cuido ta aprecia e aumento den e praktijkondersteuners pasobra e ta kita cierto trabounan di pashentnan cu ta bay rutinario cerca e dokter y asina e dokter di cas ta haya mas espacio pa e por dedica mas tempo na pashentnan nobo.