Por fin por bisa cu despues di 10 aña ta warda a pone un punto final riba e caso di e ex trahadonan di SETAR. Diamars ultimo hues a dicta sentencia na fabor di e ex trahadonan. Durante tur e añanan aki, loke tabata tardamento di e caso aki, ta cierto calculacionnan cu a wordo haci di banda di gobierno a diferencia di esun di e trahadonan, cual na final, mester a busca un accountant independiente pa por haci e calculacionnan, cual tabata tin un diferencia di algun shen florin, compara cu e calculacion di e trahadonan. Aki ta trata di un grupo grandi di trahado di SETAR e tempo ey, cu na 2002, a dicidi di no bay over pa SETAR NV. P’esey na ta wordo yama den henter e proceso aki tambe, como ex ambtenaar di SETAR, pero tambe referi como trahadonan cu retira.
Ban bek den tempo
Segun secretario general di SEPPA, Magali Brito, den e añanan 2002 a inicia un discusion riba e statuto social, na unda cu lo a regla pa e trahadonan cu ta bay over den SETAR NV y e trahadonan cu pa nan motibonan, nan ta dicidi pa no bay over den e NV. A base di e discusion aki a yega na un acuerdo di un grupo di 5 categoria y dependiendo e categoria, de facto, lo a haya un pakete di cual cu lo keda ricibi placa pa e periodo ainda cu falta, pa termina e relacion di trabao cu SETAR. Akinan e problema a surgi pasobra diripiente riba dia di firmamento di e social statuut, ta bin cambia locual cu a keda defini como kico lo ta e ultimo entrada cu e trahado lo ricibi, esta entrada bruto, y a defini esaki cu e entrada bruto lo ta basa riba decreto di pensioen. Algo cu no tin nada di haber cu e trahadonan aki, na e momentonan ey, pa motibo cu e trahadonan aki no tabata den pensioen, nan no tabata cay bao di e areglo, pues bao di ningun circunstancia por a bay di acuerdo cu e definicion aki. E tempo ey caba SEPPA a abstene di firma e parti aki. Si tabata di acuerdo cu e otro contenido y despues a sigui cu e discusionnan rond di kico lo mester ta e definicion exacto rond di entrada bruto. Berdad e problema rapidamente a presenta pa motibo cu masha lihe mes e hende a sinti con el a bay atras den su entrada, apesar cu den tur presentacion cu tabata tin na e trahadonan e tempo ey y inclusivo e director actual di SETAR NV, a duna un presentacion y mustra cu bao di ningun circunstancia esunnan cu dicidi di no bay over den SETAR NV, lo no bay atras den nan entrada pa luna. Pero asina cu nan a bay tuma nan decision, nan a bira e trahado retira, rapidamente nan a wak con nan entrada a bay atras. Ya e ora no a tene cuenta cu nan tin derecho riba pago di placa di vakantie, un suma igual, otro adaptacionnan cu durante nan trayectorio di trabao tabata disfruta di dje, pero tambe e parti di contribucion di doño di trabou, por ehempel un AOV, AZV, etc., cu e doño di trabao mester cumpli cun’e. Pero na e momento ey el a bira encargo, of e peso di solamente e trahado. Eynan e lucha a inicia. A mustra gobernantenan, e tempo ey riba e problema aki y lo bisa cu a conduci na final di 2006 pa SEPPA, STT y tambe un otro grupo di trahado, cu no tabata cay bao di ningun di e dos sindicatonan aki, a lanta un caso pa mustra con nan a wordo perhudica pa motibo di mal informacion, mal interpretacion y e caso aki ta locual cu a culmina te awor aki. Den e ultimo 10 añanan, tabata tin diferente veredicto entre medio, y cu cada biaha sinembargo tin cu bisa cu e di tres hues cu practicamente ta duna trahadonan rason den nan ponencia, solamente locual cu a bin ta tardando tabata e calculacionnan di e cifranan, kico e lo mester ta, e otro partido ta trece diferente, pakico diferencia, ken tin rason si of no, ban calcula di nobo y por ultimo, cu a duna un buelta hopi importante y crucial den henter e proceso aki, tabata cu na 2014 hues e tempo ey ta dicta cu cada un tin nan propio calculacion, tin diferencia entre nan, diferencianan ta grandi. Pa e hues por tin un miho bista ken tin rason, e ta bay pone un di tres partido den esaki pa haci e calculacionnan y el a nombra un accountant. E accountant ey a haci su trabao. Su calculacionnan a bin bisa cu ta practicamente casi mesun cos cu e calculacionnan cu a wordo haci di banda di e trahadonan y pa esaki tabata tin experto cu a yuda grandemente y haci tur trabao riba e tereno aki y e resultado aki a bay bek corte y for di eynan a keda en espera di kico lo bay ta e decision final di hues riba esaki.
A mustra cu tabata tin algun diferencia den calculacion, caminda cu e caso a keda wordo gerek, te cu a yega na dado momento cu mester a pidi un accountant pa asina bin haci su calculacionnan y comparando cu esun di e trahadonan, a bin sali na cla cu e calculacion di parti di SEPPA, compara cu locual cu e accountant a bin, ta hopi chikito y pa eynan ta haya cu e ta asumi e calculacion di e accountant como di dje y a base di esey e ta dicta tambe cu pais Aruba mester paga e trahadonan aki, cu e tempo ey tabata den su servicio y hunto cu esaki e ta bisa tambe cu desde cu e caso aki a inicia formalmente na 2006, tambe mester paga locual cu ta yama un “Wettelijke Rente”, tur e 10 añanan aki, unda cu esaya ta mustra tambe cu e partido grandemente cu tabata den fayo den henter e caso aki, cu tabata pais Aruba y cu lo mester paga tambe e diferente gastonan cu tabata tin te awor aki pa loke ta e procedura cu a wordo hiba pa mustra ken tin rason den esaki.
Den e veredicto, hues ta indica un suma poco mas di mey miyon, pero esaki ta sin e gastonan di e “Wettelijke Rente”, pero tambe tin un otro grupo cu no ta riba e listanan aki, pero ta cay como miembronan di SEPPA y/of STT, cu tambe mester bin den esaki. Ta papiando di basta placa awor aki cu ta bay haci calculacionnan exacto di e “Wettelijke Rente,” etc. Ta sigur y ta spera cu gobierno tambe por rapidamente revisa esaki of laga haci un di su mes.
