Minister di Enseñansa, Rudy Lampe a referi na e renuncia cu Sra. Sharin Luydens a presenta como presidente di e board of Trustees of College Procurator di Universidad di Aruba (UA).
A pesar di e decision aki, e mandatario a laga sa cu nan ta purba di sali for di e impasse of diferencia di opinion cu a surgi, despues cu el a dicidi di bin cu un contract nobo a base di condicionnan nobo pa e Rector di UA, Sr. Glenn Thodé.
El a bisa cu den e caso aki, e president curator di UA no tabata di acuerdo cu su opinion riba e caso aki, locual a conduci cu Sra. Luydens a entrega su retiro. Minister Lampe a declara ayera cu na e momento aki e ta purba di yega na un bon entendimento cu e College Procurator pa bienestar di universidad mes. “Nos ta yegando na un punto pa sali afo,” el a bisa.
E ta haya cu un dado momento e mester ‘give in’ pa bienestar di Universidad di Aruba mes, y nan ta bayendo riba e bon caminda. Pero el a aclaria cu cualkier entendimento mester ta a base di respet y semper respetando nos leynan.
Rector ‘afstand’
E mandatario a referi cu e diferencia di opinion entre su persona y Sra. Luydens ta trata di un punto hopi concreto. E president curator hunto cu demas miembro di e board a dicidi pa toch nombra Sr. Glen Thodé como Rector ‘afstand.’ Segun minister Lampe, Sr. Thodé ta un rector di UA cu ta biba y tambe ta inscribi na Hulanda, pero toch e tin e funcion aki na Aruba.
El a splica cu como minister a trece dilanti cu e no ta di acuerdo cu e situacion aki. Esaki a base di conseho cu el a pidi for di diferente profesor na Hulanda mes. Tambe e mandatario a wordo asesora pa su abogado pa bin cu un decision riba e asunto aki pasobra un rector ‘afstand’ no ta factibel.
El a bisa cu e mes a duna autorisacion pa dos luna Sr. Thodé keda como Rector di UA te fin di augustus. Y aworaki bao condicionnan nobo Sr. Thodé a wordo contrata. E mandatario a splica cu mirando cu Sr. Thodé no ta biba na Aruba, e tin cu haci su trabao bao otro condicion, entre otro su reunionnan ta completamente virtual y su maneho tambe ta virtual, ya cu e no ta biba na Aruba. Pero tambe e pago ta diferente.
“Mi abogado a bisa mi ora cu tin condicionnan di trabao nobo, e ta un contratacion nobo,” el a bisa. Esaki debi cu Sr. Thodé no a pasa inicialmente e procedura cu e mester a pasa pa wordo contrata.
