Ayera tardi durante e habitual conferencia di prensa riba actualisacion di caso di coronavirus/Covid-19, PR di DVG, Jurette Croes a referi na e caso nobo cu a keda registra diamars ultimo. E caso aki a kibra e barera di 100 caso positivo cu Aruba por a logra sostene pa 13 dia.
El a bisa cu cada caso positivo ta diferente. Croes a declara cu e ultimo persona cu a duna positivo ta bin for di cluster. E ta biba den un cas unda su famia tambe ta positivo. E persona aki a pasa den e cuarentena di 14 dia, y durante e lapso di tempo ey, e persona no a presenta sintomanan. “E persona aki a wordo saca for di nos registro di cuarentena un par di dia pasa,” el a bisa.
Pero cu e persona aki ta biba den un cas cu tin personanan cu ainda ta positivo, el a wordo informa pa e sigui cauteloso pa cu su sintomanan ya cu esaki por presenta, a pesar cu el a pasa 14 dia. Y esey ta loke a pasa, ya cu e persona aki despues cu a sali for di su cuarentena, el a presenta sintoma. El a tuma contacto cu DVG y despues cu a haci test, e persona a sali positivo.
Cifra di cuarentena.
Tambe a bin diferente pregunta riba dicon e cifra di cuarentena no a baha. Croes a indica cu e cifra di cuarentena ta uno hopi variabel. Ya cu tin persona cu ta bin di biahe kendenan nan ta wordo poni den cuarentena. Tin e caso di persona cu tin e contacto cu un persona positivo cu nan ta wordo poni den cuarentena.
Te ayera nos tabatin un total di 101 caso di covid-19 desde cu e virus aki a manifesta su mes 13 di maart ultimo. Di nan 89 persona a yega di recupera caba. E cantidad di casonan activo di Covid-19 a cambia di 17 pa 10 di diamars pa diaranson.
Caso negativo tin registra 1697 y un total di 1798 persona a wordo getest. Actualmente tin den cuarentena 57 persona. Croes a laga sa cu den hospital tin dos persona interna den ICU y tambe DVG tin registra 2 persona cu a fayece cu a resulta positivo pa Covid-19.
