Minister di Labor Paul Croes a informa e union sindical USA cu gobierno lo no cambia articulo 1613x cu ta regla contractonan di corto duracion.
E mandatario a manda un carta como reaccion riba un otro carta di e union sindical di 2 di september. Den esaki nan ta referi na un mail manda dia 26 di augustus unda nan a rechasa y desaproba e intencion pa gobierno haci e cambionan. Segun nan e minister no a bin cu suficiente prueba cu su intencion di cambia e articulo den e Codigo Crivil aki realmente lo crea mas cupo di trabou, en special pa hoben.
“Considerando cu un amienda na dicho articulo no ta necesario, basa cu no tin evidencia di un problema existente, insistencia di gobierno pa logra dicho cambio ta nifica un conflicto entre gobierno y sindicatonan formando USA”, asina nan a termina e carta. E sindicatonan formando USA ta STT, IOWUA, UEA, SEPPA, SADA, ABV, SIMAR, ALVAST, SIWA y FTA.
Ayera minister a informa por medio di un relato pa prensa, cu el a manda un carta pa Hubert Dirksz (di FTA) como presidente di e union sindical. “Pa falta di consenso riba e cambionan den e articulo 1613x, e lo no propone cambionan den e reunion pa trata Codigo Civil”, segun Sr. Croes.
E ta splica cu e tabata un proposicion cu el a manda pa amplia e articulo aki pa dos grupo special. Uno tabata pa personanan cu limitacion por haya e oportunidad pa contractonan pa tempo defini y tambe hobennan cu ta den un trayecto di reintegracion riba e mercado laboral. Ta dos grupo cu dificilmente ta hayando trabou y p’esey el a propone e cambionan aki.
“Nos tabatin contacto cu e presidente di e sindicato y a mustra cu no por a logra haya e consenso riba e cambionan proponi. Y mi a bisa Sr. Dirksz prome cu nan encuentro cu mi lo no haci ningun cambio sin haya e apoyo di sindicatonan. Esey mi a confirma Sr. Dirksz den e carta tambe”, segun minister Croes. E ta bisa cu awor lo keda den dialogo cu sindicatonan y gremionan comercial pa mira den ki forma por yuda hendenan cu limitacion haya mas puesto riba e mercado laboral. Tambe hobennan cu haya nan mes den problemanan social mester un extra push pa por haya un oportunidad pa traha.
No tin un problema
E sindicatonan sinembargo no ta convenci cu realmente tin un problema cu e gruponan manera e minister ta bisa. Den e carta di 2 september nan ta bisa:
“E deseo di tanto minister como e gremio comercial pa trece cambio riba su mes no ta evidencia di un problema existente of cu tin indicacion di un problema cercano. E cifranan presenta door di minister, banda di no acompaña pa ningun tipo di indicacion di nan procedencia, ta mustra cu entre añanan 2011 y 2014 Aruba a conoce un disminucion den tanto e total di persona cu ta depende di ayudo social como tambe e porcentahe di hoben y 45+ ta desemplea.”
