Tur instancia ta trahando riba abuso di mucha?
Ta varios luna pasa cu nos comunidad a haya un shock cu nunca el a haya. E señal di mal funcionamento di nos vangnet social a pone tur persona o instancia cu tabata carga algun responsabilidad core sigura nos cu nan ta comprende nan responsabilidad y cu den e caso particular aki no tabata nan fayo. Nos no tabata ni ta convenci di esey, pero madurez ta obliga nos pa no bay den ningun sorto di blame game pero a laga nos curioso pa sa kico ta bay pasa seguidamente, pa crea un situacion mehora, unda en todo caso ta hopi improbabel cu algo asina por ripiti. Nos hasta pa algun tempo a pone un banner riba un pagina, pa tene e memoria na e dos criaturanan bibo, y naturalmente como un recordatorio na tur esunnan cu tin un responsabilidad den esaki, no mirando atras sino mirando pa futuro, pa informa comunidad segun paso concreto keda tuma den e proceso aki.
Nos no ta bisa cu a bira completamente keto. Asina nos por a mira un entrevista cu e directora di departamento di Asunto Social unda na un manera bastante abierto y franco el a duna cuenta di e deterioro cu tabatin den e cuido social. Nos ta comparti e opinion ey cu ne, pasobra ta esey ta loke nos a mira sucede durante varios aña, unda gobierno tabatin otro prioridad. Nos no mester di bay ripiti tur e pasonan falso haci den e proceso aki, ni pakico a haci asina. Pero si a decepciona nos un poco cu e enfasis di e entrevista tabata riba e horror story di pasado, na luga di kico ta bay haci di awor en adelante. No cu nos kier pone e responsabel pa loke a sucede den deterioro di trabao social, pasobra el a yega recientemente den e trabao aki y sigur lo a topa cu un situacion cu ta bastante diferente di loke e tabata custumbra na Hulanda. Por ehemplo e no tabata responsabel pa e situacion idiota unda a reduci e cantidad di oficina den distrito (rayonkantoor) di e departamento, creando mas distancia cu e cliente. Nos a kere cu e filosofia mester ta cu bo ta trahando pa e grupo mas vulnerabel den comunidad, cu menos bon cu otro sa con pa busca nan caminda den bida, anto abo (gobernacion) mester bay cerca nan.
Pero kico a haci? A reduci e puntonan di contacto na tres: San Nicolas, Paradera, y oficina principal na Playa. De paso mester bisa cu e ultimo aki ta un edificio den decadencia, no digno pa un departamento di gobierno traha aden, pero enfin, nan no ta e uniconan. En todo caso, districtonan grandi manera Noord no tin un oficina mas y e pregunta ta si den e plannan pa mehoracion ta teniendo cuenta cu esaki. Tambe nos ta mira cu preocupacion e problemanan social na Sabana Basora/Pos Chikito cu formalmente lo ta cay bao di San Nicolas, loke ta un distancia basta grandi. Anto nos no ta papiando mes di e otro recursonan cu mester ta presente, di cual nos ta spera cu nan t’ey pero cu e miedo cu no ta asina.
Pero no ta solamente e departamento aki tin su cosnan di drecha y nos no ta duda di bon boluntad tampoco. Con ta para por ehemplo cu e sistema di notifica ausencia di mucha, entre scol y Inspectie di Enseñansa, den cuadro di leerplicht? Tin algo positivo di anuncia, den sentido cu a bin cu regla mas estricto y practico? Pasobra impone regla ta facil, pero nan ta factibel pa por exigi cumplimento? Tin mas capacidad na e servicio aki pa atende e responsabilidad aki?
Di otro banda, nos ta mira cu tin instancia cu a habri mas canal di comunicacion, manera Voogdijraad cu ta activo riba Facebook pa duna informacion. Esey ta bon pero no ta suficiente. Ta trata tambe di e monitoreo di mucha cu ta caba den e proceso y sin embargo por cay den un situacion unda no tin suficiente bista riba kico ta pasando cu ne. Aki ta hopi importante pa e cooperacion entre instancia keda regla na un bon manera, tambe pasobra un di e fayonan general den gobernacion – no ta trata di e instancianan cu nos ta mencionando awor ta e tendencia di enfatisa importancia di e trabao propio y no tin un deseo general pa comparti informacion. Aki aya sigur tambe lo tin obstaculo legal pa comparti informacion, ya cu tin caso unda ta trata di informacion confidencial cu no sin mas por comparti cu otro instancia. Esaki logicamente lo tuma algun tempo pa identifica y propone cambio legal unda esaki ta posibel.
Y finalmente, nos tambe sa cu e keho mas scucha ta cu ‘no hay plata’.Esey ta berdad pero tambe ta asina cu den tur trabao tin hopi cos cu por tuma luga sin cu necesariamente mester tin un saco di placa presente prome. Tambe tin algo otro cu no ta costa practicamente nada: Informacion na publico. E computer pa traha e mensahe t’ey caba y prensa ta contento cu un informacion cu por trece pa publica. Asina ta, informa nos.
