Dialuna mainta trahadonan di Serlimar a dicidi di bay den accion. Esaki despues cu siman pasa gobierno a anuncia cu definitivamente nan lo cera e dump na Partietenbos den e dianan nos dilanti.
E trahadonan representa pa e sindicatonan STA y SEPPA ta haya cu nan trabou ta na peliger ya cu e maneho di dump di parti di e compania estatal Serlimar ta un fuente di trabou pa nan. Trahadonan a bay den accion pa asina haya un aclaracion di gobierno.
E lider sindical di SEPPA Magaly Brito a declara na Bon Dia Aruba cu e decision di gobierno di cera e dump ta bay contra di e protocol cu a wordo firma gobierno na luna di december ultimo. Parti di e protocol ta encera cu gobierno mester reuni cu sindicato prome di tuma cualkier decision pa asina garantisa e trabou di nan miembronan cu ta traha na e dump. Sra. Brito ta splica cu hasta den cierto ocasion ora bisa ‘per direct’ ta linea recta contra nan acuerdo. “P’esey como gobernante e mester splica miho nan intencionnan y uzo di palabra. Minister de Meza a aclaria cu mas bien nan tabata kiermen sanacion di dump.”
Minister Benny Sevinger y su colega Mike de Meza a reuni cu e lidernan sindical di SEPPA y STA pa atende cu e demanda di e trahadonan. Na final di e reunion e gobierno a compromete su mes cu niun trahado di Serlimar no lo wordo manda cas y cu berdaderamente e dump lo cera, pero no di biaha pero lo busca otro alternativa prome. Mester tin un alternativa serio prome cu cera e dump na Parkietenbos y actualmente esaki no ta e caso. Minister de Meza ta spera cu pa fin di luna lo tin un presentacion di e plan aki na e sindicatonan. “No tin niun plan di un dia pa otro pa cer’e”, minister de Meza a bisa.
Accion trahadonan
Un grupo grandi di trahadonan di Serlimar a bay protesta dilanti di Bestuurskantoor. E accion aki a bay relativamente trankil aunke tabatin momentonan cu fluho di trafico a keda stroba. Polis tabata presente na e sitio pa asina garantisa orden. E accion di e trahadonan a termina practicamente despues cu e reunion entre gobierno y sindicatonan a caba.
Bon Dia Aruba a tuma contacto cu PR di Serlimar Natalie Wolff kende a declara brevemente cu e servicio a normalisa y cu e dump a keda habri bek. Sra. Wolff ta splica cu e asunto aki tin di haber directamente entre gobierno y e sindicatonan SEPPA y STA.
Di parti di gobierno, minister de Meza a bisa cu e trahadonan tabatin nan preocupacion cu nan trabou; pero el a splica cu biaha mas cu esaki no ta e caso. “Gobierno no tin niun intencion di niun hende bay cas.” E mandatario a agrega cu Serlimar tin su derecho di existencia.
Preocupacion gobierno
E mandatario encarga cu dump a expresa cu e preocupacion cu gobierno tin di situacion na Parkietenbos, ta e manera cu e ta wordo opera. Esaki ta algo cu tin cu bay cambia ya cu e ta considera cu no ta responsabel pa sigui opera e luga aki. “E ta hopi satura, y hopi yen. Lo bin e momento cu nos ta bay sanea e dump di Parkietenbos”.
Minister de Meza a splica cu e eventual ceramento di e dump lo crea dos escenario, uno nobo unda Serlimar lo sigui cu su actividadnan pa cu e maneho mas stricto di desperdicio di Aruba cu ekiponan y tecnologia mas avansa. E di dos escenario ta e mesun dump na Parkietenbos, ya cu despues cu e ta cera lo bin un trabou grandi pa basta aña. “Ora cu bo sanea un landfill e ta dura bo basta aña”, el a bisa. Pues esaki ta tuma no solamente tempo sino hopi cupo di trabou. P’esey e mandatario no ta haya motibo pa e trahadonan di Serlimar mester ta preocupa pasobra nan trabou ta garantisa. Ademas Serlimar lo keda e compania responsabel di e dump; y si lo tin dos dump Serlimar lo ta responsabel di esey, el a agrega. Sinembargo mester traha un plan pronto cu varios instancia envolvi pa den termino cortico, pero mediano y largo plaso bin cu un operacion mas sostenibel.
Segun Sra. Brito, gobierno ta buscando un otro luga pa un otro dump pa asina baha e actividadnan na e dump actual. E sindicalista ta sigui bisa, “Tur cos lo bay den diferente fase pero den todo caso nan lo bay cumpra algun ‘burners’ pa dump. Tin un comision cu ta ocupa cu e plan y gobierno no tin ningun intencion di bende dump. Alcontrario tur cos, tanto e dump actual, esun nobo, tur mashin bieu y nobo lo ta di Serlimar
