Dia 6 di december ultimo hues di LAR a duna veredicto den e caso entama pa activista Anouk Balentina, na unda a revoca e hindervergunning cu a otorga pa e incinerator na Parkietenbos. Esaki ta nifica cu no por haci uso di e incinerator, cu e consecuencia cu algun tipo di desperdicio, manera desperdicio medico, ta simplemente acumulando.
Minister di Naturalesa, Ursell Arends, na december a splica cu desde september ultimo e incinerator no tabata den funcion. Loke gobierno a haci ta crea depositonan, a tuma medidanan temporal y mientras tanto ta bay haci inversion den incinerator pa esaki por cuminsa opera back. E tempo aya, e mandatario a indica cu desde cu hues a dicta sentencia pa revoca e hindervergunning, gobierno a extende e medidanan cu a implementa temporalmente. El a sigui splica cu loke nan ta bay traha riba dje ta e reaplicacion pa e hindervergunning pa asina e incinerator por ta operacional back, pa por procesa desperdicio medico y carcas di bestia morto.
Minister Arends a agrega cu pa proximo dos pa tres aña mientras cu e RWZI nobo no ta cla, e incinerator mester procesa tambe e sludge. Pero unabes cu e RWZI nobo keda cla, eynan mes ta bay bin un ‘biodigestor’ cu ta bay procesa e sludge y crea coriente cu ta bay ta disponible pa operacion di e RWZI mes.
“Nos ta den proceso aki aworaki y nos tin deposito temporal cu ta sigur pa tur hende y cu no ta den cercania di e habitantenan. Esey ta e medidanan temporal cu nos a tuma tanto pa desperdicio medico y carcasnan ta bezig ta wordo dera,” el a subraya.
E mandatario a enfatisa cu bao di su mandato no ta bay bolbe kima den aire liber mas. “Un cos mi ta sigura ta cu nos no ta bay kima mas den aire liber, esey sigur no lo bay pasa mas.”
Mientras tanto, ainda no a haya un solucion pa e desperdicio medico, cu keto bay ta keda acumula den almacenahe. “Opslag ta e unico solucion cu tin,” Arends a contesta Bon Dia Aruba e siman aki, indicando cu ta haciendo esaki “den e miho forma pa percura cu no ta bira un menasa pa salud.” A indica cu Serlimar, como beheer di e tereno, ta percura pa esaki.
Ciudadanonan a cuestiona pakico no por usa e crematorium pa procesa e desperdicio medico, pero minister di Naturalesa a splica cu e crematorium no tin permiso pa procesa desperdicio di e tipo aki.
Tocante ki tipo di almacenahe (opslag), Arends a confirma pa Bon Dia Aruba cu ta wardando e desperdicio medico den container. “[Desperdicio medico] ta warda den containers pa asina warda te ora cu por procesa esaki back den incinerator,” el a indica. Y referiendo na su promesa di aña pasa, di no kima mas den aire liber, Arends a reitera: “Nos no ta kimando [desperdicio medico] y tampoco carcas na [Parkieten Bos].”
