Polis, famia y otronan a tuma despedida ayera di polis Tino Ruiz (32) cu a perde su bida durante su trabou siman pasa. Segun alto comisario Dolfi Richardson nan ta investigando e caso ainda pa asina siña di dje.
Pero aunke e agresor cu tambe a perde su bida, tabata un conocido di polis, segun sr. Richardon esaki no ta nifica cu por a preveni e incidente. “Si e tabata un conocido pero tabatin mas biaha cu nos a deal cu ne y semper a bay bon. Pero e biaha aki el a bay robes. Y esey ta haci nos trabou hopi dificil” Pero e ta bisa cu sigur lo haci un evaluacion di nan procesonan.
Algo prome di 1or y mey e marcha a sali for di cas di famia di e defunto na Noord unda a bay direccion misa di Noord. Banda di caminda por mira e personal completo di Botica St. Anna pafo pa duna respet. Un trahado ta conta cu sr. Ruiz tabata un ‘pashent’ di nan. Como cu Tino tabata e unico yiu, e ta haya e ta hopi duro tambe pa su famia. Y ‘e bida di polis cu ta den peliger’.
Un otro mirado, un ex trahado di CEA cu ta conoce Tino, ta bisa cu e no ta kere cu por a preveni e situacion. Como cu hende mental e ta dificil. E ta haya tambe cu na Aruba no tin un luga pa hende asina haya tratamento adecua: “Bo ta drenta, y sali.” E ta bisa tambe cu e ta wak cu e problema ta bira mas grandi como cu hopi hende jong ta cay den problema asina pa motibo di droga of problema familiar.
Polis di afo presente
Vocero policial Liliana Rasmijn ta comenta cu ‘e entiero tabata uno hopi conmovedor. “Coleganan di tur departamento di Cuerpo Policial tabata presente. Coleganan di hermana islanan Corsou, Bonaire y Sint Maarten tambe a bin pa brinda nan respet y apoyo pa sostene nos den e momento dificil aki.”
Varios colega di otro departamento y instituto di gobierno tambe a presenta pa mustra respet na e difunto. Coleganan y amigonan di KIA, CEA, Kustwacht, RST y Rode Kruis tabata presente, pero tambe por a nota e presencia di US Customs and Border Protection (aduana Merca).
Sra. Rasmijn: “Nos a duna colega Tino un entiero cu tur su honor. Nos ta sostene famia di Tino den e momento tristo aki. Danki na pueblo cu a sa di biba cu nos y e famia e dolor cu a haci di perde nos colega y un polis ehemplar.”
