Diamars pasa a tuma lugar na sede di Haagse Hogeschool na Den Haag e despedida di prof. dr. Raymond Gradus como presidente di College financieel toezicht (Cft), alavez College Aruba financieel toezicht (CAft), cubriendo den e calidad aki casi seis aña di operacion di e organismo aki.

Cft a inicia a base di e acuerdo di restructuracion di Antiyas Hulandes na 2010, unda a crea dos isla autonomo (Corsou, Sint Maarten) y e tres islanan cu a bira teritorio Hulandes como parti di Pais Hulanda. Esaki a bay acompaña pa un saneamento financiero pa reduci e debe Antiyano cu tabata cerca di 5 biyon florin. Despues, a base di e intervencion di Reino den e situacion na Aruba na 2015, a crea bao di e mesun organismo e colegio specifico pa Aruba.

Den su ultimo acto como presidente, sr. Gradus a repasa e historia di 12 aña di supervision financiero, pa un audiencia cu a inclui vice-presidente di Raad van State, Thom de Graaf, miembronan di Raad van State pa e tres islanan autonomo, ministronan plenipotenciario, y varios invitado mas, enfocando riba e ultimo periodo den cual e mes tabata un actor importante. Su experiencia den esaki a keda concretiza den un buki cu e titulo “Reflecties op zes jaar financieel toezicht” di cual e audiencia a obtene un ehemplar. E obra ta contene entre otro loke Gradus a trece dilanti den varios presentacion cu el a yega di tene na diferente isla, incluyendo Aruba.

Encuanto e situacion actual na Aruba, Gradus ta conclui cu economia a recupera cada vez mas rapido di loke a proyecta, pero e ta haya cu a usa e oportunidad pa pone orden den finanzas publico di manera insuficiente. El a mustra riba e hecho cu na 2021 economia a recupera considerablemente, sin embargo entrada gubernamental apenas tabata mas halto cu e aña di crisis 2020. Aña 2022 si a duna otro imagen, pero a termina ainda cu un deficit, di cual Gradus ta insisti cu esaki por tabata hopi mas limita, loke ta haci cu 2023 apenas lo bira e promer aña di un surplus, si gobierno cumpli cu su propio proyeccion. Tambe e ta señala cu ta logra un surplus, mientras e gastonan tambe ta aumenta te cerca di Afl. 85 miyon mas halto cu e periodo pre-Covid (2019).

Gradus a referi tambe na e reforma fiscal cu ta contempla un cambio pa BTW, cu momentaneamente ta para, mientras a introduci un extra 1% riba e actual BBO. Gradus ta comenta cu si e aumento di peso fiscal (aumento di BBO) bay acompaña pa reduccion di gasto, anto ta mas probable cu ta logra e surplus pa por cancela debe. Gradus ta mustra riba e tendencia di aumento di e tasanan di interes na nivel internacional, loke ta haci mas urgente pa yega na reduci e debe publico, cu ta keda den e proximo añanan na un nivel di Afl. 250 miyon anual na interes, mas pronto posible. Exito den logra esaki lo ta menos dependiente di e aumento di peso fiscal, si baha gasto di personal y di bienes y servicio. Esaki ta importante pasobra keda aumenta impuesto no ta sin riesgo economico, segun Gradus. Aruba den consolidacion di presupuesto ta conta demasiado riba aumenta e peso fiscal, mientras cu economia lo tin mas probecho di reduccion di gasto, e ta conclui.

Den e ronda di pregunta for di sala, a haci Gradus e pregunta si Gobierno di Reino, entre su tareanan di supervision y di colaboracion benevolente cu e islanan, tin e tendencia di scoge mas tanto pa e aspecto di bon colaboracion, mientras cu tin ora mester duna claridad den forma di enfatiza e aspecto (necesario) di supervision. Gradus a enfatiza di manera diplomatico cu, como organo di conseho, no ta na su persona pa comenta actuacion di gobierno di Reino, cu finalmente ta tuma decision cual aspecto ta prevalece. Sin embargo, refiriendo na e conseho di 2022 di CAft pa duna Aruba un ‘aanwijzing’ pa reduci su gastonan, e ta mantene su posicion cu e conseho pa e aanwijzing tabata corecto. Awor, e decision contrario ta alarga e proceso di recuperacion financiero, cuminzando apenas e aña aki cu un surplus cu por usa pa cancela debe, loke ta un caminda basta largo pa baha di e 93% di GDP actual te na un nivel mas manehable di 55%.

 

Tambe den su disertacion Gradus a mustra riba importancia di e recomendacion pa introduci e BTW na januari 2024, y pa tambe sigui e demas consehonan di IMF, manera un limitacion di e deduccion di interes di hipoteca, y eliminacion di deduccion di interes riba credito di consumo, eliminacion di deduccion di gasto di un empleo (inkomstenbelasting), aumento di accijns y introduccion di ‘vermogensbelasting’ (impuesto riba patrimonio; red.).

Na final di e ceremonia sr. Gradus a pasa e batuta di Cft/CAft pa su sucesor, sra. drs. L.M.C. (Lidewijde) Ongering. Mientras tanto, sra. Ongering lo ta na Corsou caba pa inicia su trabao na e islanan.