Despacito, cosnan ta cambiando na Aruba despacito, nan a cuminsa vota pa partido chikito y caba cu e cuenta di vota den ekipo. Despacito! Mi hendenan, ma pasa full dia 22 di september lanta purbando di keep up cu eleccion na Aruba. Ban papia!
Mi a echa yen baina riba Facebook, haci dimas cu joke cu Satanielys y Satanson tabay goberna e isla awo, pero ban papia serio si. Personalmente, mi no ta mucho contento cu e resultado. Pero mester ta realistico basa na e opcionnan cu tabata tin. Mi tabata kier wak AVP perde un poco poder pasobra mi tabata pensa cu ultimamente nan a abusa di dje. Specialmente despues di e ultimo debate, tabata ora caba pa full e grupito ey haya un reality check. Pero mino por nenga con hopi mi ta desconfia MEP. Y no ta basa riba nan vision pa Aruba, cual riba su mes tabata mustra di ta uno bon. Nos tur sa cu sra. Evelyn Croes a show out durante tur debate y fan di dje of no, esun cu bisa cu e no a duna su best na tur momento ta gewoon un hater. Aunke, mane nan ta bisa na Spanjo “Del dicho al echo hay mucho trecho” nos lo mester wak si e promesa por wordo ehecuta es bunita cu el a wordo papia.
Mi ta un feminista, mi tin boca grandi tocante esaki, mi a pasa full e campanja bisando “Bondia na tur hende excepto esunnan cu no ta considerando vota pa un politico muher” pues e ta normal pa hende pensa cu mi ta feliz cu nos lo tin un prome minister femenino. Claro, esey ta si e rumornan ta berdad. Cos por cambia ainda, pero pasobra cu MEP tin un storia mucho diki di xenophobia ami no por fake felicidad. Nel Oduber su “no hay cama pa tanta gente” ta algo cu hopi no a lubida y bo ta wak esaki tambe den votacion. MEP a busca caranan nobo, hopi candidato cu ta mustra di tin bon intencion, pero ni asina pueblo kier confia den nan ciegamente pa duna nan mando completo di e isla atrobe. Miso den mi camber ta sinta pensa si Aruba su “Trump era” tabay cuminsa. Como Latina, como yiu di un mama soltera immigrante, como un muhe di color, como un hoben cu ta identifica como bisexual, mi ta cuestiona con dilanti nos lo bay cu partidonan cu no ta kere den igualdad. Kico si mi kier ta cu un muhe den futuro? Kico si mi kier casa riba e isla cu a criami y cu mi a aporta na dje solamente pa enfrenta e echo cu mi matrimonio no tin validez?
Nunca mi tabata comprende e hype rond di nos prome minister Mike Eman, semper mi a puntra rond dicon tanto hende tabata asina devoted na un homber cu den mi perspectiva tabata “too much heart and not enough guts”. Compara cu un Dowers por ehempel, cu semper a papia den un tono mas asertivo. Mi amigonan ta bisa cu ta pasobra e ta bon hende, otronan ta hura cu Mr. Eman ta tur cos menos un corupto, cu el a prefera di hinca placa den klinkers y no den su saco, etc. Hende ta critica kico el a haci, pero mi no ta mira su despedida como un acto di cobardia, pami e ta basicamente manera analysa un relacion. Ora confiansa bay, eno tin sentido pa keda forsa cos pasobra ta tur dos banda di e medaya tabay sufri. AVP a perde voto casi tur caminda y aunke ni asina MEP por a gana nan, e mensahe tabata cla y raspa. Pueblo simplemente no tabata mucho contento cu e gobierno saliente.
Pero si nos pone tur cos un banda, na final di dia podise e victoria real ta echo cu poco poco politica riba e isla ta cambiando. Cu di berdad tin un forsa nobo y mino ta refiriendo na e partido politico. E victoria ta cu “status quo” a wordo sacudi den manera di bisa. Cu esunnan cu a bin sin mucho fanfaria, sin budget y sin bandera a briya net lo suficiente pa duna un tiki luz na e final di e tunnel. Ami no sa mucho di politica no, mi djies sa cu Aruba merece mas, cu e isla por, cu esunnan cu no ta respete mester wordo pasa un mep pa nan drecha curpa.
Pueblo, nos tin cu sigui, pa dilanti ta nos unico opcion pues ban tuma esaki sin miedo.
