– Departamento di Salud Publico (DESPA) ta ofrece conseho y yudansa na tur habitante di Aruba cu ta planeando of ya ta preparando pa sali di biahe pa un destinacion recreativo of exotico, un vakantie di aventura of hasta un siman riba un barco di crucero. Latifa Mercera, kende ta enfermera na Servicio di Malesanan Contagioso, ta duna algun tip valioso y ta invita tur persona cu tin cualkier duda tocante e vacunanan necesario of medidanan di prevencion pa acerca nan.
Tin tres siman ainda prome cu vakantie cuminsa y mester tene na cuenta si e destinacion di vakantie tin un of otro exigencia pa cu vacuna, awo ta e momento pa verifica e informacion y tuma e vacunanan necesario.
Latifa Mercera ta informa cu tin pais cu tin presencia di keintura geel (gele koorts), malaria of sarampi. Den algun caso ta conseha e bishitante pa tuma un vacuna y den otro caso e vacuna ta un exigencia y condicion pa biahe. Por ehempel, e persona cu ta biaha pa Brazil via di Colombia no ta wordo permiti pa subi avion si e no a tuma un vacuna contra sangura geel.
Vacuna
Diferente destinacion tin diferente exigencia y e vacunanan ta hopi importante, como cu ademas di proteccion contra malesa tambe tin e factor di “admision”. Pues, si bo no a tuma e vacuna bo no ta wordo admiti den e pais.
E vacuna contra sangura geel, por ehempel, mester wordo tuma 10 dia prome cu biaha pa e pais unda tin e malesa pa asina sigura cu e persona ta protegi. Na algun pais ta exigi e vacuna di malaria, un malesa transmiti pa sangura cu por resulta den morto. Personanan cu ta biaha bay Mecca, por ehempel, mester di e vacuna contra sarampi, Latifa Mercera ta agrega.
Travel kit
Tambe mester tene cuenta cu e biaheronan cu ta bay un vakantie activo, unda cu e risico pa contrae tetanus ta grandi si nan haya un herida of corta durante di un actividad manera “cliffhanging” of “mountainbiking”. Particularmente pa e grupo aki, pero en realidad pa tur hende cu ta biaha, ta importante pa hiba un “travel kit” cu ta inclui paracetamol, alcohol pa haci herida limpi, pleister, un remedi cu ta alivia problema di stoma of tripa y si ta aplicabel condom, tambe e remedinan cu e persona mester tuma diariamente.
Pa mas informacion tocante e contenido di un bon “travel kit” tambe por tuma contacto cu DESPA.
Estado di salud
Lativa Mercera ta splica cu mester semper tene na cuenta e estado di salud di tur hende cu ta biaha hunto. Muchanan chikito y hende grandi tin un sistema inmunologico mas sensitivo, tambe mester tene na cuenta e condicion di personanan cu tin diabetes of presion halto y cu tin personanan tambe cu tin cierto enfermedad of ta tuma un of otro remedi cu ta afecta nan sistema inmunologico. Semper corda hiba tur remedi necesario. Tene extra consideracion di e personanan cu tin un limitacion of desabilidad.
Condicion y calidad di awa
E condicion y calidad di awa na e destinacion ta un factor hopi importante pa tene cuenta cun’e. Bebe awa di boter, skeiro djente y laba boca cu awa di boter y hasta laba fruta manera appel cu awa di boter. No come ningun fruta of berdura cu ta wordo comi curu y cu bo no por casca bo mes, pasobra nan ta wordo laba den e mesun awa di cranchi cu por contene substancia of parasito cu por haci bo malo, Mercera a splica. No bebe awa di cranchi.
Na Mexico por ehempel tin parasito den e awa y no por laba djente tampoco cu e awa di cranchi. Evita di come berdura manera lechuga, como cu nan a wordo laba den e mesun awa cu bo no por bebe.
Si ta haci calor, bebe hopi awa. Si bo tin keintura, of un diarea of griep cu no ta pasa, busca asistencia medico.
Come solamente cuminda cu ta herbi of bon cushina.
Leynan di pais bishita
Latifa Mercera ta conseha tambe pa tene cuenta cu e leynan di trafico den e pais cu bo ta bishita, semper bisti faha di siguridad y considera tuma un seguro di biahe pa evita gasto inespera, tanto pa loke ta trata accident y condicion di salud.
Souvenir no desea
E tipnan cu e enfermera ta pone hopi enfasis riba dje pa evita trece un “souvenir no desea” bek cas ta: no bula den awa di rooi of riu of lama cualkier caminda pasobra aunke e ta mustra bunita por tin parasito cu por afecta e salud, tene cuidou cu corta na curpa y pa no trapa riba obheto cu por causa herida cu por resulta den un infeccion; no mishi cu animal riba caya, pasobra nan por tin malesa cu por keda transmiti pa bo via un rasca of mordi.
DESPA ta urgi tur persona cu wordo mordi pa un of otro animal of haya un herida of infeccion pa busca asistencia medico di biaha como cu tin parasito, bacteria y virus cu por causa morto dentro di 24 ora.
Latifa Mercera a duna e ehempel di turistanan cu a bay campa na Surnam y a lanta for di soño cu sanger riba nan clechi, pa despues nan haya sa cu ta raton di anochi a morde nan den nan soño.
Na DESPA por yuda e persona cu ta bay cu vakantie cu diferente tip. Ta duna asistencia pa check kico e conseho di biahe pa su destinacion ta y pues kico e mester tene cuenta cu ne, incluyendo e vacunanan necesario.
Fotocopia
Como ultimo tip Latifa Mercera a agrega pa no lubida di tin un fotocopia di paspoort y e documentonan di biahe, pa si perde algo of nan wordo horta semper tin un copia cu por mustra y por manda e informacion Aruba of embahada pa por haci e tramitenan pa un paspoort nobo.
Si acaso bo bolbe di vakantie cu un “souvenir no desea”, manera keintura, diarea, of un herida, consulta cu bo dokter di cas mas pronto posibel, pasobra e malestarnan aki por tin consecuencia no desea y hasta fatal.
