Diadomingo awor dia 20 di maart, mas di un miyon dentista di 200 diferente organisacion di 130 pais rond mundo, lo uni cu e Federacion Dental Mundial (FDI) pa celebra Dia Mundial di Salud Oral y enfoca riba e importancia di mantene un bon salud oral. Ya caba, mas di 40 pais a compromete nan mes pa yuda mehora salud oral mundialmente y demostra kico un bon salud oral ta nifica pa nan. E compromisonan aki, cu ta contene recomendacionnan practico pa cuido di boca y djente, ta riba e website di World Oral Health Day pa inspira y curasha otronan pa mehora nan cuido oral.
Tras di tur e celebracion aki tin un mensahe hopi serio. Cuido oral deficiente ta asocia cu diferente enfermedadnan, entre otro enfermedad di curason, cancer di pancreas, pulmonia y enfermedad di pulmon.
Tin un conexion entre un bon salud oral y salud en general. Den un estudio 40% di personanan cu enfermedad di carni di djente grave tabata sufri di un condicion cronico adicional.
Meta principal di e dia mundial di Salud Oral ta pa informa comunidad cu un bon salud oral ta mas cu bunita sonrisa, un bon salud oral tin relacion estrecho cu bienestar general.
Enfermedadnan di boca ta afecta 3.9 biyon hende rond di mundo y 60% pa 90% di muchanan mundialmente ta sufri di caries dental. Sinembargo tin un falta pa compronde e rol crucial cu salud oral tin pa nos salud general. Pasonan simpel manera skeiro djente tur dia dos biaha pa dia durante dos minuut, mester ta integra den nos rutina diario!
Dia Mundial di Salud Oral ta un bon oportunidad pa nos tur ta mas consciente di e importancia cu salud oral tin pa nos salud general.
.jpg "Nadien Phillip: Come local y segun temporada ta duna mas balor nutritivo na consumido")
