Entrante otro siman Departamento di Salubridad Publico (DESPA) lo cuminsa cu un campaña di prevencion y conscientisacion den tur media riba malesa di influenza.

Dokter. Maritza Ordoñez a informa cu aunke influenza ta un virus cu ta presente den henter aña, e temporada aki di yobida ora cu e temperatura ta baha un tiki, e ta plama mas lihe. Aruba ta un isla turistico y esaki ta un factor cu nos por haya e tipo di virus aki tambe.

Pa tal motibo un team di e departamento aki lo forma parti di e campaña di prevencion como un instrumento efectivo pa combati influenza. Ya cu unabes cu bo ta wordo preveni di influenza bo por evita otro sorto di malesa cu por afecta bo curpa.

Influenza
E aña aki nan campaña di prevencion lo ta mas grandi considerando cu aña pasa durante e temporada aki a wordo registra cantidad di caso di influenza, te hasta cu victimanan fatal. Durante e luna di november, december y januari e clima ta cambia birando mas fresco. E clima aki ta uno ideal pa e virus di influenza por bira mas resistente. Te hasta luna di maart e posibilidad di bo wordo contagia cu e virus di influenza ta mas halto cu den otro lunanan di aña.

Sra. Ordoñez a laga sa cu e vacuna contra influenza ta na caminda. PAHO (Organisacion Panamericano di Salud) ta trahando hopi duro pa eventualmente otro siman Aruba por haya e vacuna aki. Ta existi varios tipo di influenza ya sea A, B, C te hasta e famoso N1H1, pero esun mas comun ta influenza tipo A. Nan ta biniendo cu un vacuna cu ta cubri tur e tipo di influenza aki, el a laga sa. E ta un vacuna basicamente nobo di un cobertura mas amplio cu esun prome.

El a declara cu e aseguradonan 60 plus di AZV lo haya e vacuna aki sin paga pe. Igualmente e pashentnan di risico grandi of malesanan cronico no mester paga pe. Mientras cu esun interesa pa haya e vacuna mester paga 15 florin so, ya cu e vacuna aki ta subsidia.

“Nos ta keda pendiente na momento cu e vacuna yega pa mesora haci un yamada pa tur hende pa bin tum’e”, el a bisa. Tin biaha e vacuna ta causa un reaccion chikito cu ta algo natural, ya cu e vacuna ta activa bo anticurpa pa combati e virus, ora bo curpa ta menasa di hay’e.

Ya caba DESPA tin un plan di accion pa tur hende cu ta sinti su curpa malo cu e sintomanan di influenza. E prome paso ta cu bo mester bay mesora na bo dokter di cas pa e dokter por diagnostica si berdad ta influenza.

Prevencion
E prevencion ta uno facil y e ta cuminsa cu e labamento di man. Tin momento specifico cu bo tin cu mantene un bon higiena di bo man. Un di nan ta prome y despues di come. Tambe despues cu bo a bay baño of ora un mucha ta sali hunga pafo. Igualmente ora cu bo ta traha den un sitio caminda constantemente bo ta duna man ta bon pa laba nan debidamente. Si bo tin chens pa laba nan cu awa y habon ta bon sino bo por haci uzo di e gel of wipe sanitary pa preveni virus.

E ta conseha cu si bo ta den un reunion y bo ta ripara cu un persona ta tosa of nister hopi ta consehabel pa keda leu di dje. Un recomendacion ta bay pa e personanan cu tin e tipo di malestar aki entre nan keintura, coremento di nanishi, nister, tosamento, etc.. ta bon pa keda na cas. Si den e temporada aki bo ta presenta e sintomanan aki eventualmente e por ta influenza.

Ta facil pa influenza por plama den un sitio ya cu si un persona ta nister of tosa esaki ta haci cu e virus por afecta bo, ya cu e ta un virus hopi resistente. Nan por keda basta rato bibo den cualkier glas, telefon, etc.. cu e persona malo a uza.

El a haci un yamada na henter comunidad pa tene cuenta cu influencia ya cu aña pasa a wordo registra 10 caso di morto relacion cu influenza. “Bo no kier pasa Pasco ni Aña Nobo riba un cama of bishitando un famia na hospital, ” el a declara.

Keintura geel
Otro malesa cu DESPA ta monitor di cerca ta e malesa di keintura geel. Sra. Ordoñez ta premira cu pronto nos autoridad lo bin cu un exigencia obligatorio pa tur hende cu ta bin di un pais endemico cu e malesa aki, mester ta vacuna contra e virus aki. Nan mester mustra un certificado valido. Te hasta e hendenan cu ta bay sali fei di nos isla pa otro destinacion unda nan tin e malesa aki di keintura geel, nan mester haya e vacuna prome.

Algun sintomanan di keintura geel ta precisamente bo ta cuminsa haya keintura halto y bo color di cuero ta bira un tiki gel. Tambe bo ta haya sacamento, dolor di cabes y bariga. Nan ta sintomanan specifico cu ta mustra bo indicacion cu posiblemente bo a haya e malesa aki.

Sra. Ordoñez a informa cu actualmente no a wordo registra niun caso. Pero nan ta monitor cu tur dokter di cas mandando tur sorto di informacion riba e desaroyo di epidemianan den nos region. E pais bisiña di Venezuela ta keda un preocupacion debi na casonan di malesa entre nan di keintura geel.

Ya caba tin un programa di prevencion cu ta inclui diferente instancia entre nan hospital, aeropuerto, inmigracion y otro partnernan manera ATA, pa cuminsa pidi e bishitantenan cu ta bin di paisnan unda tin e sorto di malesa aki pa nan bin vacuna contra yellow fever of keintura geel. Tur e estudio aki a wordo haci pero ainda ta falta algun detaye prome cu nan ta introduci e exigencia di e vacuna aki. Pero nan ta evaluando e forma con nan lo introduci mas facil.