Relaciona cu insultonan riba rednan social dirigi na e victimanan di e tiramento na Orlando pa politico di AVP, locutor na Power Fm y trahado den sector di cultura di Gobierno, sr. Robert Frank Maduro, Parlamentario Desiree De Sousa Croes ta conta Bon Dia cu porta otro hende no lo ta di acuerdo pero un despensa di curason ta suficiente.
”Otro hende kisas lo wak e diferente pero pa mi un despensa di curason ta bal hopi y e ta suficiente. ” Sra. Croes ta bisa Bon Dia despues di a puntra si e relacion nan ta bay sigui normal y si no lo ta necesario pa tuma medidanan por ehempel pa pidi retiro di sr. Maduro. ”No , mi no ta un persona vengativo of rencoroso. Ya cu el a mustra grandesa di bin ofrece su disculpa y cu mi a acepta esaki, mi a dera mi hacha di guera. Si e lo a defende su eror, lo tabata un otro storia” sr. Croes a splica.
Sr. Croes ta agrega cu un medida asina no ta na su persona pa tuma sino na e doño di trabao. ”Basta hende a bisa cu sr. Maduro mester retira si, mi opinion personal ta si cu partido mester pensa bon cu si kier sigui cu un persona cu ta comparti ideanan cu por cualifica como extremista of en todo caso basta sensitivo pa hopi den comunidad. E decision ey tambe ta partido mester tuma y no mi persona” sra. Croes a bisa.
Sr. Croes ta agrega cu den caso cu sr. Maduro no a mustra grandesa di tuma responsabilidad pa su acto nan manera cu el a haci, e no lo a duda ningun momento so di no yega cas di partido mas tanten cu e ta miembro. ”mi no tin nada di haci memey di hende cu no ta respeta mi, pero cosnan ya a wordo soluciona na un manera corecto” , sra. Croes a bisa.
Otro miembronan di LGBT Aruba no ta acepta disculpa
Segun Sra. Croes, varios miembro di LGBT na Aruba segun e ta compronde cu nan si no ta acepta e disculpa di sr. Maduro ya cu nan ta sinti nan mes hopi ofendi.
”Esaki nos ta compronde y nos ta respeta. Ta asina cu tur hende por tin su mesun opinion of tin su mes sentido di humor y ta haci joke racista, sexista of homofobico. E comunidad LGBT ta consciente si cu hopi biaha nos ta suheto di chiste nan di mal gusto” sra. Croes ta bisa.
Bon Dia a puntra sra. Croes si esaki a yega di pasa caba den pasado si tabata tin experiencia caba cu esaki anto kisas ningun di e insultonan of comentario nunca a yega rednan social te awo. ”Esey mi no sa ya cu si e no yega social media ta dificil pa mi por haya sa esaki. En todo caso, no tin duda cu su comentarionan tabata denigrante y sumamente ofensivo. El a expresa su disculpa por medio di sr. Maikel Kelly, Presidente di ALFA na henter comunidad di LGBT Aruba. El a brasa sr. Kelly y bisa su persona cu no tabata su intencion pa ofende ningun hende y pa e por fabor acepta su disculpa. Despues el a pone un frase masha nechi den e registro di condolencia cu lo wordo manda pa e gobernador di Orlando pa mustra convivencia di nos comunidad pa esun di nan. ” sra. Croes a bisa.
