Gobierno a regla e relacion entre negoshinan cu buki 2 di Codigo Civil, pero Parlamento ta wanta e areglo entre persona door di no pasa e ley di ehecucion di e cambionan den e otro bukinan di e cuadro di e ley. Asina mr. Desiree Croes, ex Parlamentario y abogado a bisa Bon Dia Aruba. Croes ta sinti su mes hopi envolvi cu e Codigo Civil nobo pasobra e ta inclui un amienda cu ta hopi cerca di su curason, cu ta e legalisacion di ‘geregistreerd partnerschap,’ na Aruba. Pero e ley ta regla mucho mas.
Por ehempel, den buki 5 di e Codigo Civil nobo tin un introduccion di 5 dia di tempo pa pensa riba producto caro cu a cumpra. Ora di cumpra un auto, un cas, un tereno, e ta pasa un proceso y ta registra y si e otro no cumpli, automaticamente e registro ta brinda proteccion na e cumprado. E proceso aki ta regla den otro ley. Sinembargo, no tin un sistema asina den compra di otro producto cu ta mas caro, pero cu no ta cay bou di un registro. “Por ehempel, si un hende ta cumpra un renchi y ta kere cu e ta oro, pero despues di yega cas, ta realisa cu e ta laba den oro. E cliente ta haya 5 dia pa pensa riba e compra,” Desiree Croes a splica.
Divorcio
Un di e problemanan cu abogadonan cu ta tuma casonan di divorcio ta confronta, ta gastonan cu un of ambos den un matrimonio ta dicidi pa haci gastonan despues di separa. “Nan ta den divorcio, pero ta core haci debe. E debe ta bira di e matrimonio,” Croes a bisa. “Si pasa e ley pa e Codigo Civil nobo bira vigente, e debe ta di e individuo cu a haci, despues cu ya a entrega e peticion di divorcio. E ta kita hopi dolor di cabes pa abogadonan. Pasobra ora cu un pareha entrega peticion di divorcio, tur e gasto cu nan haci despues ta pa responsabilidad di cada uno. Awor aki e ta un problema grandi.”
Derecho di mucha
Pero kizas e impacto mas grandi ta pa derecho di mucha. “E meldpunt pa abuso di mucha ta regla den e Codigo Civil nobo. E ‘vetrouwensarts, e necesidad pa e codigo, tur ta regla den e ley. Awor ta traha a base di maneho di Gobierno. Nan ta trahando den anticipacion di e cambio, a base di maneho. Pero e ley mes ta pega.”
Ademas den e Codigo Civil nobo, ta inclui e prohibicion pa dal mucha. Croes a sigui splica cu e Codigo Civil nobo ta enfoca riba e necesidad pa proteccion di mucha cay bou responsabilidad di mas Minister, y no unicamente e Minister di Husticia, sino cu Minister pa Asuntonan Social y Minister di Salud Publico tambe ta envolvi den proteccion di mucha. Asina ta envolvi mas instancia den proteccion di e mucha.
Locual a pidi den un mocion na 2016 pa trece un cambio den e nomber di Voogdijraad. “E ta mas cu djis un nomber. Nos a propone pa e bira mescos cu Hulanda, unda e ta e Conseho di Proteccion di Mucha, unda ta hala di e enfoke di e derecho di mayornan, unda ta enfasis ta riba e derecho di mucha. Y tur esakinan ta pega.”
Amienda nr 7
E amienda pa legalisa ‘geregistreerd partnerschap’ berdad tabata entrega pa mr Desiree Croes. El a entrega su amienda tres luna prome cu a trata e Codigo Civil nobo. Tabatin resistencia contra e amienda y na final, a acepta un di tres amienda cu a carga cu e firma di lidernan di fraccion di MEP, AVP, RED y Parlamentario Independiente e tempo ey, Marisol Lopez Tromp. Parlamento a acepta e di tres amienda aki. Y Croes no por kita di e impresion cu ta e amienda aki ta locual ta stroba pa vota pa e Codigo Civil nobo.
E ta reconoce cu den fraccion di AVP tambe tin resistencia contra e amienda. Pero asina mes, e partido a permiti e na 2016 pa presenta e amienda, a pesar cu AVP tin un ideologia basa riba religion, cu ta Cristian Temporada. “Tabatin mas hende di AVP cu a vota pa e amienda cu fraccion di MEP cu ta un partido social democrata, cu no ta un ideologia basa riba religion.
Awor aki cu RED cu ta hiba un ideologia liberal tambe mester por sostene e ley aki, den concepto di Desiree Croes, cu no solamente ta duna parehanan di mesun sexo e derecho pa registra nan relacion, pero tambe ta regla hopi derecho civil cu ta urgente.
