Investigadonan na un universidad top na Hong Kong ta bisa cu nan a desaroya un capa anti-microbial nobo cu por spray riba superficienan pa mata mayoria di bacteria y virus – incluyendo coronavirus – pa hasta 90 dia.
Conoci como MAP-1, e capa anti-microbial a wordo diseña pa uso den un variedad di superficie incluyendo glas, metal, plastic, cuero y tela, segun Hong Kong University of Science and Techno0logy (HKUST).
E capa ta dura ‘significantemente mas largo’ cu desinfectantenan convencional cu ta usa alcohol of clorox, cu ta perde nan funcion mientras e likidonan ta evapora, segun HKUST. Pa yuda logra esaki, ta depende riba polymer sensible pa calor cu su inventornan ta bisa ta responde na contaminacion di un toke of di druppel. E ta haci esaki liberando un cantidad mas grandi di desinfectante ora ta detecta un aumento di temperatura cu por tuma luga ora nos man toca un superficie of ora tin druppel.
E capa anti-viral ta spera di yega tiendanan na Hong Kong proximo luna despues di test clinico den e ciudad na februari, segun Reuters. Centronan comercial, scol, iglesia y facilidadnan deportivo na Hong Kong a usa e capa, segun investigadonan, kende tambe ta bisa su ingredientenan no ta toxico.
Transmision di coronavirus a parce di debilita na Hong Kong, unda a reporta cero caso nobo di COVID-19 durante varios dia siman pasa. Te cu dialuna, Hong Kong a reporta 1,038 caso di coronavirus y cuatro morto.
