Manera DVG a informa mediante un comunicado di prensa algun dia atras, e casonan di COVID na Aruba ta aumentando un biaha mas. Bon Dia Aruba a tuma contacto cu Marleen Bakker di Dr. Horacio Oduber Hospital pa asina ricibi mas informacion tocante e aumento di e casonan.
A pesar cu aworaki COVID ta simplemente cay den e lista di enfermedadnan respiratorio infeccioso, e cantidad di caso cu ta aumentando tin un efecto riba tur e instancianan di cuido medico na Aruba.
Bakker a indica cu desde luna di mei e casonan a cuminsa aumenta, cual tambe ta riparabel den e cantidad di persona cu a ser interna na hospital. Desde luna di mei te cu luna di juli hospital a registra un total di 27 persona cu a ser hospitalisa pa motibo di e virus di COVID. Di e 27 persona aki, tres tabata adulto mayor riba 75 aña cu a keda interna den Unidad di Cuido Intensivo (ICU).
Segun DVG ta informa, den e ultimo 5 siman cu a pasa, e aumento ta refleha cu un di cada tres persona cu a test a sali positivo pa COVID. Aunke ya desde 5 di mei 2023 oficialmente COVID no ta constitui un emergencia di salud publico di importancia internacional, e ta keda un virus di preocupacion, sobretodo pa e grupo di persona mas vulnerabel den comunidad.
E gruponan aki ta ciudadano riba 60 aña, mucha bao di 2 aña, hende muhe na estado y ciudadanonan cu ta sufri di malesanan cronico of cu tin un sistema inmunologico debil.
DVG ta conseha e personanan aki evita contacto cu personanan malo y evita espacionan unda tin hopi persona. Medidanan importante manera laba man frecuentemente, evita mishi cu wowo, boca y nanishi cu bo man no laba y semper laba man prome cu come tambe ta keda vigente.
Sintomanan di COVID ta inclui, entre otro, dolor di garganta, keintura, nanishi ta core, tosamento, curpa kibra of cansa, dificultad pa hala rosea.
Ta recomenda tur persona cu tin e sintomanan aki pa tuma contacto cu nan dokter di cas trempan pa monitor e situacion y tambe haci test di COVID pa seguridad. Den caso cu esaki ta positivo, ta suplica e personanan contagia pa keda paden y evita contacto cu otro personanan pa asina evita propagacion di e virus.
Ademas di aumento di casonan, un variante nobo tambe a keda detecta. Segun informacion, e variante aki ta menos peligroso, mas leve, den comparacion cu variantenan anterior. Pero a pesar di esaki, tur ciudadano mester tuma e medida- y precaucionnan necesario si test positivo.
