(NLTimes)—Studiantenan den educacion mas halto por aplica pa financiamento di estudio basico pa prome biaha den ocho aña. E financiamento pa studiantenan na universidadnan HBO y universidadnan WO ta bay regresa otro aña escolar. Esnan cu tin derecho pa esaki por aplica na e Agencia di Educacion Ehecutivo (DUO) cuminsando dialuna. E servicio a ser anuncia caba na comienso di luna.
E suma di financiamento ta extra halto pa e prome aña academico. Pa via di e aumento skerpi den costo di energia y compras, gobierno ta bay duna casi 440 euro pa luna na studiantenan cu ta biba leu di cas. E cantidad usual ta 275 euro pa luna pa studiante cu no ta bibando na cas y 110 euro pa esnan cu si ta biba na cas cu nan mayornan.
Si mayornan ta gana menos cu 70.000 euro den total, un studiante tambe por ricibi un financiamento suplementario. Desde e comienso di aña, DUO a check e opcion aki den e proceso di aplicacion pa financiamento di estudio. Esey a causa un aumento significante den e cantidad di aplicacion. Prome cu a cambio ey den e website di e servicio, hopi studiante no a aplica pa placa cu nan tabatin derecho p’e.
Segun DUO, aproximadamente 430.000 studiante, incluyendo casi 124.000 studiante den nan prome aña, tin derecho pa e financiamento basico nobo. E servicio a lansa un campaña nacional pa encurasha studiante pa aplica pa e financiamento basico na tempo. Studiante cu a aplica prome cu 1 di september ta bay ricibi nan prome salario den september, DUO a bisa.
Organisacionnan di studiante a bringa pa hopi aña pa e financiamento basico regresa y pa e sistema di prestamo pa studiante disparce. E sistema di prestamo a ser introduci na 2016. Dia 6 di juni, e Senado Hulandes a aproba e ley pa regula e reintroduccion, cual a haci e regreso di financiamento basico sigur, despues cu Tweede Kamer a aprob’e caba.
