E vocero di Aeropuerto Internacional Reina Beatrix, Endy Croes, diahuebs pasa a duna di conoce durante un conferencia di prensa cu den proyecto Gateway 2030, cu ta proyecto di expansion y modernisacion di aeropuerto, nan ta cla pa drenta den siguiente fase.
Croes a splica cu e fase aki ta pa scoge e contratistanan cu ta bay atende e proyecto aki, pero prome cu esey, nan mester haci algun preparacion y como parti di e proyecto lo ta encera cambionan den area dilanti di aeropuerto, denomina como ‘Wild Parking’.
Aunke aeropuerto tin su dos area di parkeer, esun cu tin dak cu solar panel, pero tambe esun mas pabou cu no ta tapa y tambe ta un area unda e hendenan por parkeer. Banda di esey tin hopi usuario cu ta traha na aeropuerto of cu ta bishita aeropuerto cu ta haci uzo di e area aki.
Croes a laga sa cu desde dia 1 di december proximo, esaki no lo bay ta posibel mas. Pa motibo di preparacion pa contratistanan cu ta bay haya e proyecto aki, lo mester di e area pa pone su ekiponan pa por traha durante e periodo di tres pa cuatro aña. Loke ta nifica cu pa tres of cuatro aña, e area cu ta dilanti aeropuerto, cu aworaki ta pertenece pa Gobierno, nan a duna pa aeropuerto pa asina por haci uzo di dje.
Di mesun manera, Croes a aclara cu esun cu kier haci uzo di e area aki mester paga e contribucion, cu tur luna mester paga 55 florin na e area cu no tin dak y na esun cu tin solar panel ta 110 florin pa luna. Pero mirando cu esaki ta bay afecta un grupo di 300 pa 500 auto pa luna di december, ainda e prijs aki ta aplicabel, pero pa 1 di januari 2020 nan lo pone un descuento den e parti cu no ta tapa y esun cu tin dak.
Tambe Croes a bisa cu hende cu lo mester haci uzo di e parkeerplaats di aeropuerto, mester manda un e-mail na commerce@airportaruba.com pa asina por avisa cu ta interesa pa haci uzo di esey y pa haya instruccionnan di kico lo haci siguientemente.
