(NewYorkPost)—E ta e tipo di malesa transmiti sexualmente cu ta mas comun den hende, pero aparentemente no tin suficiente conscientisacion cu esaki por causa varios tipo di cancer. Un encuesta pa e Asociacion Mericano pa Investigacion di Cancer a descubri un reduccion den conocemento cu e virus papilloma humano—of HPV—tin un conexion cu cancer di barmoederhals, como tambe cancer anal, oral y di penis.
Investigadonan a nota cu conocemento di e conexion entre e virus y cancer tabata e motibo mas grandi pa hende tuma nan vacuna contra HPV. Uzando data colecta pa e Encuesta Nacional di Informacion di Salud riba Trendnan, a puntra participantenan: “Bo ta kere cu HPV por causa cancer 1) anal; 2) di barmoederhals; 3) oral; y 4) penis?” Contestanan tabata “si,” “no,” y “no ta sigur.”
Investigadonan a descubri cu e comprondemento di participante tocante e conexion entre e virus y cancer a cay cu 7%–for di 77.6% na 2024 pa 70% na 2020. Casi 30% di participante di e encuesta tabata na haltura cu HPV por causa cancer di penis, garganta y anus. “Mas cu 90% di cancer relata na HPV por ta prevenibel cu e vacuna di HPV, pero no hopi hende no ta tumando esaki,” segun un autor di e estudio, Eric Adjei Boakye, a bis den un comunicado.
Casi 54,5% di hobennan na Merca ta ricibi tur recomendacion di dosis di e vacuna, mientras cu e obhetivo di e gobierno ta pa yega na 80% di vacunacion pa esnan entre 10 pa 19 aña di edad. Boakye a bisa cu un aumento den conscientisacion por yuda logra e obhetivo aki. “Un di e motibo pakico no tin hopi vacunacion ta pa e hecho cu hende no sa cu esaki por preveni cancer,” el a conta NBC.
E vacuna contra HPV pa mucha muhe entre 9 y 26 a wordo aproba pa CDC na 2006. Esaki a expande pa mucha y hende homber na 2009 pa proteha contra cancer anal, oral y di penis. CDC ta recomenda pa muchanan haya nan vacuna rond 11 of 12 aña, cu dos dosis prome cu nan haci 15 aña. Tres dosis ta recomenda pa esnan cu a cuminsa cu e serie di vacuna mas despues.
CDC ta calcula cu mas cu 42 miyon Mericano tin un variante di HPV, y 13 miyon hende ta infecta tur aña.
