E crimen a tuma lugar den un iglesia evangelico conoci como Asamblea di Dios, situa na municipio Itaborai, na Rio de Janeiro Brasil, pagina G1 (O Globo) a publica.
E victima identifica como Custodio Gonçalves di 57 aña, tabata traha tambe na guardia municipal di Itabori, informacion cu a ser confirma pa algun amigo. Dialuna marduga polis a detene un sospechoso cu obhetivo di tende su declaracion,pasobra te awor autoridad no conoce e motibo di e crimen.
Violencia na Rio de Janeiro a crece den ultimo lunanan pa motibo di un guera entre bandanan cu ta bringa pa haya control di narcotrafico y pa e crisis economico cu ta reina na Rio de Janeiro, cu ta produci un situacion cu tiki polis operando riba caya. Varios persona a mustra solidaridad y a manda mensahe di apoyo pa henter famia riba rednan social, como un homenahe na e pastor cu a muri. E culto evangelico a gana bastante tereno na Brasil den ultimo añanan. Na 1994 un 75% di poblacion di Brasil tabata catolico, pero e porcentahe a keda reduci te 50%.
E grupo di evangelico a crece te representa un 29% di poblacion. Entre 2014 y 2016 e religion catolico a perde 9 miyon di seguidor na Brasil. Na e pais Sudamericano e grupo di hende evangelico a haya hopi poder politico y economico.
