Abogado di FTA, Hose Figaroa ta referi na e situacion di e trahadonan na pia di trabou  teniendo na cuenta nos ley laboral.  E hurista ta haya cu nos ley laboral ta bon y si tur dunado di trabou ta cumpli cu e ley aki, nan como sindicato practicamente no tabatin trabou pa haci.

“Pero lamentablemente e echo cu tin ley no ta garantisa cu tur hende ta bay cumpli  y p’esey e sindicato t’ey tambe.”

E ta haya cu nos ley laboral no tin tanto buraco, pero e problema mas grandi ta keda cu e mesun trahado den mayoria di caso no ta na haltura di nan derechonan laboral. “Tanto bal bo tin shen ley y e trahadonan di e shen ley no ta conoce ni cinco.”

E desconocemento di e ley laboral di parti di e mesun trahado ta duna base pa e dunado di trabou ta haci mal uzo di e situacion aki.  Abogado Figaroa a trece como ehempel e famoso articulo 1613X cu FTA a carga e bandera durante un trayectorio cu nan ta considera como “dificil” como sindicato pa mantene e articulo aki. “E ta un articulo cu ta regula na ki momento un compania mag di duna un contracto di corto duracion si of no.”

Ley laboral
A pesar di intento haci di parti di gobierno, e ley aki a keda identico, manera e tabata ta den pasado. Asina mes durante e ultimo aña y mey FTA ta ripara cu hopi dunado di trabou viola e ley aki. Esaki a pesar cu e ley aki ta regula strictamente ki ora bo mester duna un contract di corta duracion toch nan ta tuma hende bou contract cu no ta cumpli cu ley.  Pero di otro banda e trahadonan tampoco no ta busca su derecho na momento cu esey ta sosode. Igualmente ora cu e trahado ta bin busca su derecho keriendo cu e ta fiho den su trabou, e trahado hopi biaha pa no sa miho ta laga su derecho un banda.

Den sintesis e no ta haya cu nos ley laboral tin buraco of cu e ta faya sino cu hopi biaha e trahado  no ta na haltura di su derechonan. Sindicato parcialmente su trabou ta cu na momento cu un doño di trabou ta desconoce e derechonan di e trahadonan y no ta cumpli cu leynan, nan ta actua pa protege e clase trahado. Pero e ta haya cu parti di e trabou di e sindicato tambe ta esun di educa nan miembronan mas tanto posibel di kico ta su derechonan.

Abogado Figaroa ta bisa cu pa aña 2017 FTA lo haci un esfuerso mas grandi pa mas tanto riba e nivel di nan delegadonan pa duna un estudio basta amplio di ley laboral. Nan ta e  prome persona cu un trahado na pia di trabou tin cu acerca na momento cu tin un problema; y ta importante cu nan tin un idea con nos ley ta na momento cu un trahado ta presenta cu un problema.  Di e forma aki, nan por gui’e lo mas  miho posibel.