Desastre den Dimas… No ta bay drecha…

Na momento cu a anuncia e gabinete nobo y e reparticion di cartera a bira conoci, mayoria di esnan cu conocemento di e procesonan administrativo relaciona cu permiso di residencia, a keda asombra pa e decision di pone tanto e cartera di Labor como di Admision den un solo man ministerial. Anto ki sorto di man… Di un politico cu den pasado a haya un prohibicion di bira ministro di parti di gobierno di Reino, pero cu aparentemente a laga su mala custumber di no por mira un pen sin cuminza firma cos. Contal cu awor si e por a bira ministro, pero no pasobra ta pordona, nos mester lubida… E ministro nobo no a tarda pa mustra Aruba ta den ki direccion su maneho ta bay, hincando tur su rumannan den su despacho, desafiando henter comunidad den e caso mas obvio di nepotismo cu nos por corda. Y tur esaki cu aparente bendicion di nos Promer Ministro, cu no ta perde un oportunidad pa papia di integridad y mas di e palabranan bunita ey, cu te awor a keda na palabra so.

Sin embargo, awor cos ta birando mas serio pa loke ta admision di stranhero. Recientemente tabatin incidente caba unda cu e ministro ta corta den maneho di cartera di Husticia, dunando permiso di estadia na hende cu a cana henter e proceso hudicial caba, unda huez a haya cu nan mester bandona e pais. Aki por a mira claramente pakico tabata asina importante cu Dimas mester a keda den su ambiente natural, den ministerio di Husticia y ningun otro caminda. Si kier argumenta cu den pasado a combina asunto di Stranhero cu otro cartera cu no tabatin nada que ver, e contesta mester ta cu durante e gobierno unipartidista 2001 – 2009, Hulanda a pone presion pa reemplaza e ministro di Husticia di e tempo ey, pa iregularidad den otorgamento di permiso. Esaki ta ilustra tambe cu e pertenencia di Dimas unda e mester ta no ta garantia tampoco pa integridad, pero esey ta algo cu ta conta pa tur.

Contal cu durante e gobierno ey a yega na e acuerdo cu e cartera di Dimas ta pasa pa e ministro encarga cu Infrastructura y Planificacion, como solucion mas ‘elegante’. E siguiente gobierno unipartidista tampoco a pone Dimas back den Husticia y e periodo ey tambe a conoce su practicanan dudoso den Dimas. Sin embargo, e señalnan di corupcion den Infrastructura cu comercio ilicito cu tereno publico tabata mas fuerte ainda, y ta loke te awe ta domina e scenario. Pero nos no ta lubida e incidentenan cu tabatin den Dimas, cu nombramento di un director adhunto cu a haci un carera ‘relampago’ den e departamento, cuminzando como bode… “Only in Aruba,” nos a yega di comenta caba den e Editorial aki. Personal di Dimas a ‘walk out’ un biaha, a bay back paden y nunca mas a tende di e asunto. Pa colmo, e ministro encarga e tempo ey a laga conseho di ministro aproba e nombramento di e director/bode, cu autoridad pa firma permiso.

Ora cu a kere cu e gobierno nobo na 2017 lo a pone un punto final na e practicanan aki cu no tin absolutamente nada di haci cu bon gobernacion, a resulta cu nan no a mishi cu e asunto mes; e director/bode a keda na su puesto. Loke e actual ministro encarga a haci ta bay un paso mas leu, sacando un decreto ministerial den cual ta concretiza e isolacion di e directora mas ainda. Menos cu seis luna den e periodo di gobernacion nobo por mira ta den ki rumbo e cos ta bay, cu e destitucion di e directora y nombramento di un ‘management team’. Pa colmo ta resulta cu e team ta conta cu presencia di un miembro cu a gana su meritonan riba tereno di anda di manera delictivo cu datonan confidencial. Esaki ta e persona cu ta bay garantiza integridad di e datonan di Dimas? O mas bien esaki ta señal ta pa unda nos ta bay, unda aparentemente bo mester haci malo, cu strafblad y tur, pa haya merito? Tin comentario cu tur hende mester haya un oportunidad nobo; di acuerdo, pero no den e mesun tipo di trabao unda nan a echa baina. By the way, esaki no ta e unico persona den servicio di e mandatario cu un strafblad… Ki ehemplo ta duna na nos yiunan cu mester bolbe bin traha aki, cu diploma y no strafblad…

Den tur e incidentenan aki, ta puntra unda Promer Ministro o e ministro encarga cu Integridad ta keda. Nos no ta ni puntra. E nombramento di un ministro pa un cartera explicito di Integridad ta pa crea un pantaya, hustamente pa su tras tur ministro por dal bay cu maneho dudoso, si nan scoge pa haci esey, loke no tur ta haci. Asina e partner grandi den gobierno tin e yabi pa yega na, o para cualkier legislacion encuanto integridad. Nos pronostico: no ta bay tin nada sustancial ta sali, mientras e ministro encarga cu integridad ta carga cacho pa su coleganan cu no sa cana straight. Ken a manda hende carga speranza?