Desaroyo sostenible y mil camber: Aruba entre lema y realidad

E debate tocante e hotel all inclusive na Sero Colorado ta sigui cu tur vigor, y aunke nos a comenta ampliamente riba e tema, tin momento cu nos ta kere cu mester reacciona atrobe. Y loke ta provoca reaccion ta e argumentonan cu nos ta scucha y lesa, cu no semper ta cuadra.

Tuma por ehemplo e debate encuanto e argumento lansa cu ‘San Nicolas tambe merece desaroyo’. Esey riba su mes nos por califica como un observacion general corecto. Es mas, San Nicolas no tin nada di proba cu e merece desaroyo, San Nicolas a keda neglicia pa varios decada pasobra na otro banda di e isla tabatin suficiente oportunidad pa gana placa. Awor cu tur hende ta mira cu no por tin tanto desaroyo mas, aunke ainda ta hinca nos cu mas di 2.000 camber den e parti sobrepobla di Aruba caba, ta sigui practica e mesun politica di desaroyo kiboca aki na e parti pariba di e isla. E punto no ta si San Nicolas merece desaroyo si of no, e punto ta cu San Nicolas merece algo miho cu esaki…

Kico ta e punto di salida kiboca den e asunto aki? Cu ta tuma como punto di salida otro aspecto cu no tin nada di haci cu San Nicolas. Loke ta pasando cu nos tin un gobierno cu ta hinca cu e problema serio cu nan a hereda: un situacion financiero sumamente dificil, cu no tabata nan problema pero awor si e ta, y nan ta contempla solamente solucion rapido. E solucion rapido no ta pa corta gasto den gobernacion, pasobra esey ta toca e baca sagrado di semper, pero e ‘quick fix’ number un ta ranca for di cartera di e ciudadano loke tin di ranca ainda. Esey a tuma lugar caba. Anto e di dos quik fix ta e tipo di proyecto aki, cu ta parce masha bunita pero cu a lo largo no ta beneficia ni San Nicolas, ni Aruba: un ‘mega-proyecto’ manera e hotel aki, hungando na manera tradicional cu sentimento di hende, alegando por ehemplo e desempleo grandi cu tin, etc. Awor, banda di e hecho cu ta existi cierto desempleo, nos ta kere, pasobra cifra confiable e departamento concerni no por produci, esey nos mester resolve cu un cantidad asina grandi di cupo di trabao” Cu ta haci cu mester importa mayoria di nan? Pasobra no mester lubida cu e mas di 2.000 camber na e otro banda tambe ta bay rekeri entrada di personal pa mayoria di e cambernan ey.

Esaki ta trece nos riba e problema di vivienda pa hospeda tur e hendenan aki. Si e refineria no muri so, pero nan der’e tambe, esey ta implica cu nos a keda cu un ‘mancamp’ cu nos por usa pa hospeda sikiera parti di e personal di exterior? Un di e promotornan di e hotel, cu su derecho, ta alega cu no mester vivienda pa manager pasobra esey lo tin caba. Pero mi shon, no ta e managernan ta e problema, sino e miles di trahador di salario chikito cu mester haya un lugar di biba, segun nan cartera por paga. A pensa riba esey? Di baina nos ta tende di e problema aki, pasobra esey semper ta un di e tareanan cu ta benta riba comunidad, cu mester crea e facilidadnan aki. Nos ta bay haya otro ola di apartamento den cura di hende? Y a pensa ki consecuencia e yegada di miles di hende por significa pa aumento di prijs di apartamento y otro tipo di vivienda, cu consecuencia tambe pa e Arubianonan cu ainda no por afford un cas y ta biba den un apartamento bon caro caba? Aki si ley di mercado ta bay manda, cu su consecuencia tambe pa esnan cu ta na Aruba caba.

Pero tur esey naturalmente no ta problema di e desaroyador di e proyecto; nan a bin pa traha camber di hotel, con Aruba ta regla e resto di asuntonan, esey ta Aruba su problema… Pero, no ta net pesey nos a pone un ministro eynan, pa na nos nomber e desaroya e politica necesario, contestando tur e preguntanan fastioso cu ta surgi? Y ora ta papia di maneho responsable, y pa usa palabra di e mesun gobierno aki, no ta tempo pa busca ‘desaroyo balansa y sostenible’? No ta esey nos por a tende durante henter campaña y despues? No ta esey tabata e palabranan clave, banda di ‘transparencia y integridad’? Nos mester lubida cu nos a caba di bin di un experiencia bastante negativo di un gobierno cu ocho aña largo a bati nos cabes cu lemanan parecido? Y kico a resulta di tur esey? Nada mas cu e ‘megadebe’ manera e gobierno nobo aki ta yam’e, cu nan razon, pero nos mester bay pasa den un siguiente ronda di lema grandi cu den practica no tin ningun contenido?

Sin embargo, si nos kier pensa positivo, y ta kere cu no ta trata di lemanan bashi, anto ban cuminsa pa pone e mandatarionan concerni responsable pa duna contesta na e inkietudnan hustifica di hopi ciudadano, cu a sinti un alivio cu e anuncio poco dia pasa di e moratorio, pa awor mester tende cu gobierno a tuma otro rumbo, sin duna cuenta?

LJMADURO – 08-MAR-2019