TNO a termina su operacion na Aruba. Un noticia cu casi a bay perdi entre otro noticia cu ta hala mas atencion. Sin embargo, lo ta bon pa nos para keto un rato pa reflexiona kico esaki ta encera. Di un banda ta facil pa hinca esaki den categoria di ‘proyecto fracasa’ di e gabinete anterior y no preocupa mas cu e tipo di iniciativa aki. Nos por purba analisa un tiki mas profundo pa averigua pakico e tipo di iniciativa aki no a cria raiz na Aruba y despues cu e financiamento inicial a desaparece, no tin un base pa mantene nan mes.

E proyecto di TNO tabata un intento pa trece capacidad di investigacion sofistica mas cerca nos y mas cerca e region aki. Despues di e patrocinio pisa di parti di gobierno di Aruba e instituto lo tabata mester a busca su mes caminda y crea su mes fondonan a traves di atrae investigacion riba tereno cu nan por cubri cu nan experticio, unda lo 1por a haya apoyo for di e base amplio di TNO na Hulanda. Asina leu cu nos a sigui e desaroyonan, despues di e inicio cu bastante trabao na Aruba mes, hunto cu e sponsor, gobierno di Aruba, e proximo fase di busca contratacion pa e capacidad di investigacion specialisa den nos region, a resulta un desafio demasiado grandi. Y esey tin un motibo. Esey ta cu den casi tur ramo tecnico tin compania specialisa cu ta hopi avansa den atende e problemanan tipico cu ta tuma lugar den nan sector. Ta ora nan no por maneha un problema recurente cu ta di gran importancia, por ta cu e companianan mas grandi ta acudi na e tipo di institucion specialisa manera TNO.

Un bon ehemplo di esaki ta loke ta sucede den un sector manera petroleo y gas, cu tin caba nan manera pa yega na nan experticio superspecialisa. Companianan manera Halliburton y ABB Lummus ta asina avansa den nan desaroyo di tecnologia, cu hasta e Chavistanan a bin ripara, di mal manera, cu nan no por haci nada si nan no tin e apoyo tecnico aki.

Realmente nos mester yega na e conclusion cu Aruba, y region di Caribe, ta demasiado chikito pa e tipo di instituto aki. Esey nos a tende personalmente tambe di e gerente Hulandes di e tempo ey di TNO Aruba, cu no tabata mira futuro aki na Aruba. El a haya razon, pero kico ta e mensahe di awor pa futuro? Nos mes ta bay sigui unda nan no a logra? Nos ta kere cu no. Loke si por ta un posibilidad ta cu e asociacion pa desaroyo sostenible cu a crea pa sigui cu e trabao, haya un reorientacion den direccion di mas capacidad general pa apoya desaroyo sostenible, y no un instituto cu capacidad y conocimento tecnico so. Y pakico esaki? Segun nos opinion nos ta mira cu e metanan di desaroyo sostenible cu ta un guia pa e trabao cu cada pais mester planifica y ehecuta no ta rekeri na prome lugar un ekipo tecnico, sino cu tin un necesidad grandi di un ekipo multidisciplinario cu tin e capacidad pa analisa y diseña pa cada meta, nan ta 17, un ruta pa cana den e proximo añanan. Tin cierto tema cu lo rekeri cierto experticio tecnico pero hopi di nan no. Por ehemplo, pa loke ta e meta di energia renovable mester di suficiente experticio tecnico pa por comprende y evalua diferente posibilidad cu ta ofrece, pero mayoria di e temanan no. Ta hopi importante pa por conta cu specialista riba tereno socio-economico y specialista riba cierto tema specifico, cu talvez ta dificil pa haya na Aruba mes. Aki ta hopi importante pa por conta cu bon lazo di cooperacion cu instituto specialisa den exterior, cu no mester ta limita na Hulanda… Loke ta igualmente sumamente importante ta cu mester realisa cu no ta yega na desaroyo integra sostenible, si no ta acopla e diferente temanan pa preveni cu nos ta haya desaroyo riba un tereno ta contradeci desaroyo den otro. Esaki ta exigi un otro manera di traha na nivel gubernamental. Un bon ehemplo reciente con no mester haci e cosnan aki nos a haya den e proyecto di ley di Serlimar, unda di un banda gobierno a pronuncia den su programa di gobernacion di ta pro un economia ‘circular’ unda cu procesamento optimal di desperdicio ta primordial, y na mes momento ta bay di acuerdo cu introduccion di un incinerator den un plan di operacion cu ta contradeci un maneho circular.

Segun nos purba avansa cu e metanan pa 2030, nos lo bin ripara cu lo tin mas contradiccion, o mas interes contrario cu mester acomoda di cierto forma pa por avansa. Pero e cambio mas grandi cu mester bin ta den e mentalidad isleño cu ta existi na nivel ministerial tambe, sino nunca lo logra sincronisa plannan gubernamental a mas largo plazo. Y aki tin un mal noticia mas pa tur partido politico: si ta keda traha cu e proximo eleccion como maximo horizonte, anto no por ehecuta un plan di desaroyo sostenible, unda nos ta papia desaroyo stipula pa 10 pa 20 aña. Esey ta e parti di planificacion di desaroyo sostenible cu nunca nos ta haya tende…

LJMADURO – 11-DEC-2019