Den e temporada tras di lomba e trahadonan cu ta forma parti di e proyecto Brug pa Oportunidad a haci trabou di limpiesa y mantencion na diferente luga publico aki na Boneiro.
E proyecto Brug pa Oportunidad ta un proyecto cu Entidad Publico Boneiro a inicia na cuminsamento di aña 2021 cu e meta pa crea posibilidad di trabou pa e personanan cu a perde nan entrada a consecuencia di e pandemia di Covid-19. Pa por yuda e grupo di enfoke aki, Entidad Publico Boneiro a pone medionan financiero disponibel i via di Plenchi di Trabou a bin den contacto cu esunnan cu a perde nan trabou pa motibo di e pandemia. E Directorado di Planificacion y Desaroyo hunto cu Selibon a yuda crea cupo di trabou pa e personanan aki. E trabounan cu ta eherce den cuadro di e trayecto aki ta entre otro: rosa y kap mata, y mantencion di area publico.
Den e ultimo lunanan cu a pasa ta varios trabou di limpiesa y mantencion a tuma luga principalmente den diferente bario di Boneiro. Na Rincon e trahadonan a haci trabou di limpiesa na: Plasa Broertje Janga, Plasa Hubentud y na e Gruta di Lourdes. Den e bario di Tera Cora a limpia parti pafo di Pal’í Tamarein y tambe un parti di Kaya Mgr. Niewindt. Na Nikiboko a haci trabou di limpiesa na Parke Lanlan Clarenda parti pafo y tambe e trahadonan a traha na Te Amo Beach.
Awo ta sigui cu e trabounan na un area berde den e bario di Belnem y ora termina ey, nan ta bay cuminsa cu trabounan di limpiesa na e luga di sambuya yama Tolo y despues sigui completamente cu Caminda Turistico.
Cu e proyecto Brug pa Oportunidad gobierno di Boneiro ta duna un man na tur esunnan cu a perde nan trabou a consecuencia di e crisis di Covid-19 y alabes ta percura pa Boneiro keda limpi y bon mantene tanto pa su habitantenan como pa e turistanan cu diariamente ta bishita e isla. Esaki sigur ta un desaroyo positivo.
