Ainda tin areanan na Aruba unda awa di pos ta bay directamente den lama

Cu mas di 100 mil habitante y cu como 1.7 miyon bishitante pa aña, Aruba ta produci un variedad di tipo di desperdicio, entre otro desperdicio medico, kimico, plastic, azeta, awa sushi, y cadaver. Mayoria ta acumula riba e isla y Aruba no a logra maneha e problema aki, segun e rapport di CARMABI, cu Gobierno a laga traha na 2019. Un rapport cu e fundacion cientifico na Corsou mes a publica.

Segun e ‘baseline’ study cu mester a determina e estado di caynan di coral di Aruba, desperdicio riba tera y lama tambe ta hunga un papel crucial pa e salud di e coralnan.

Sushedad y desperdicio na Aruba generalmente ta bay den e dump di Parkietenbos cu ta keda banda di lama, pero ademas di esey, tin diferente otro dumpnan mas chikito rond Aruba. E landfillnan aki ta produci ‘leachate’ (red. definicion di leachate ta un likido contamina genera for di awa cu a pasa door di un luga unda ta acumula desperdicio, y ta acumula contaminante y ta plama den otro areanan). E likido contamina aki ta afecta calidad di awa bao tera y awa di superficie. Aumento den concentracion di metal pisa a keda identifica den varios area di dump na Aruba.

Ainda tin awa di pos ta bay lama tur dia

CARMABI a mustra cu e planificacion di e planta di gas tabata planifica pa soluciona e problema di desperdicio, e disposicion di nutriente y contaminante (incluso di beerput) cu ta lek den tera y awa ta mas problematico y no ta hayando atencion.

Tin cuater area, Seroe Colorado, Bayerlite na Savaneta, Pos Chikito-Fardaystraat, y e urbanisacion di WEB unda awa sushi, esta awa di pos residencial ainda ta bay directamente den lama. Tin tres facilidad di purificacion di awa, unda parcialmente ta trata e awa sushi residencial y di hotel (Bubali ta esun cu problema).

Pero CARMABI ta mustra cu sedimento cu ta bin di e superficie di Aruba, nutrientenan, pesticida, herbicida y otro material cu ta contribui na polucion ta drenta lama pa medio di biento y yobida. Un fraccion di e nutriente ta keda absorba, pero exceso di nutriente no-organico ta drenta awanan cerca di costa tambe.

Nutrientenan cu ta drenta e ambiente marino por kda transporta den distancia largo y ta aumenta e vulnerabilidad di coralnan pa keda infecta cu malesa y stress, ademas cu e material aki ta promove crecemento di alga. Presencia di nitrogeno entre otro por encurasha crecemento di e asina yama phytoplankton, un microalga cu ta absorba luz di solo y ta stroba coral di crece, of nan por causa crecemento di otro alga of yerbe di lama cu ta competi of domina e coralnan, algo cu a sosode na Corsou. Tambe nan por causa cu ta consumi e oxigeno di awa, cu ta crea zonanan morto. Riba dje, rifnan di coral ta cambia ora cu componentenan basa riba carbon ta drenta awa, entre otro ora awa di pos ta contamina esakinan. P’esey, e rapport di CARMABI ta bisa cu mester minimalisa e fluho di awa di pos den lama pa preveni e microbiolizacion di e rifnan di coral di Aruba.

Microbiolisacion

Microbionan ta considera e organismonan cu ta dirigi e procesonan di ecosistema. Nan ta cambia nutriente den biomassa di plankton, cu ta sostene e cadena di cuminda marino. Comunidadnan natural di microbio sinembargo ta afecta pa materialnan no-natural cu ta drenta lama, pa medio di entre otro awa di pos. Y e microbionan robes por afecta salud di e coralnan, spons, yerba di lama y otro organismo, incluso hende. Pero sobrepesca y temperaturanan mas halto tambe ta trece presion cu por conduci na sobrepopulacion di microbio peligroso

Sedimento

Sedimentacion den awanan costal por ta hopi halto despues di yobida pisa, particularmente ora cu ta rosa terenonan pa desaroyo. E sedimentacion den areanan urbanisa ta combina cu otro producto manera fertilizers, pero tambe herbicida, pesticida, detergente y otro cu ta bin di awanan sushi pa motibo di un infrastructura deficiente. Sedimentacion y daño mecanico asocial cu cobamento di e fondo marino pa contruccion y mantencion di waf y facilidadnan di refineria tambe a impacta e bida marino rond Aruba. Nan a conduci na concentracion di sedimentonan den areanan costal. Actividadnan di boto y bapor ta pone cu e sedimentonan ta keda move rond y e sistema ecologico marino ya no tin e complexidad topografico pa wanta e fluho y stroba cu e sedimentonan ta keda plama.

E cantidad di santo blanco di Aruba, produci pa organismonan marino cu mester suplementa e beachnan continuamente y ta preveni erosion costal, a keda afecta pa reclamacion di tera for di lama (manera e construccion di e hotel Renaissance Suites. Red. E proyecto tabata inicialmente Harbaortown Aruba cu despues a pasa pa Renaissance) y otro actividad di cobamento pa santo. Por ehempel, e cobamento pa crea e waf di Playa entre 1948 y 1952 a impacta severamente e cantidad di santo blanco di Aruba. A saca 150 mil meter cubico di santo fini, cu ta mas fini cu santo di coral normal di e beachnan. A tira e cantidad grandi aki banda di costa na Pelican beach y for di e tempo ey e, tur dia tin 35 meter cubico di e santo fini ta bayendo direccion nort. Esaki a afecta e area di Palm Beach cu consequencia cu hotelnan cu inicialmente tabata traha leu di lama, awor ta cerca di awa. Den otro palabra, e beachnan a bira mas chikito.

Industria petrolero

E desaroyo di e refineria y e actividad di ‘transhipment’ y e cantidad di tankinan di petroleo a afecta e calidad di rifnan, pero con hopi no a keda cuantifica. E abundancia di coralnan cu ta yuda construi rifnan a cay hopi te cu 10 kilometer leu di e refineria. Crecemento di coral banda di refineria tabata cero durante e ultimo añanan di Lago. E actividad di refinacion na Aruba a afecta henter e area, pa medio di lekmento di material y kimiconan riba tera y e uso di areanan pa benta desperdicio di refineria y azeta, metal pisa, y tur otro tipo di desperdicio toxico. E impacto mas negativo di e industria petrolero di Aruba tabata for di e lekmentonan di e tankinan den bahianan di San Nicolas y Commandeursbaai y otro. E necesidad di awa limpi, a pone cu e actividad petrolero a haci e awa di lama rond di e refineria bira mas salo.

Actividad Humano

Actividadnan di hende hasta memey riba e isla por impacta lama y e rifnan. E impacto di actividad urbano por keda mitiga unda tin boskenan di mangel of yerba di lama. Particularmente ora cu nan ta memey di e rifnan y tera. Na e momentonan aki tin construccion den area cu antes tabata considera indeseabel pa traha cas, por ehempel den areanan cu ta den biento yena cu salpeter, manera e parti noreste di Aruba. Ta areanan cu generalmente a keda sin e toke humano pa urbanizacion, aunke cu nan ta popular pa turismo. E fragmentacion di e habitat ta considera un di e causanan principal di degradacion ecologico di habitatnan natural. Aruba, segun National Geographic ta un di e destinacionnan di isla cu tin integridad di su espacio mas afecta, y ta considera un fabrica di vakantie cu beachnan fabuloso pero cu ta demasiado construi, sin estilo y cu perdida di cultura.

Turismo

Gobierno di Aruba a pasa pa desaroyo di turismo cu e tema di ‘solo,santo y lama,’ pa contraresta e caida di e contribucion economico di e industria petrolero. Y ta un sector cu a crece rapidamente. No ta un secreto cu e construccion di hotel tabata hopi, y e acomodacionnan grandi ta domina mas na Aruba compara cu otro pais. Consequentemente e producto turistico ta relativamente homonegico, orienta na un segmento limita na e mercado Norte Americano. E estudio di Professor Sam Cole y Victoria Razak na 2009 a mustra cu Aruba a neglisha oportunidadnan potencial pa crea un otro producto cu ta mas basa riba experiencia cultural autentico, herencia y otro atributo local.

E estudio di CARMABI ta un analisis amplio di e situacion di Aruba cu tin impacto riba e populacion di coral na Aruba, y manera a indica, tur actividad di hende tin su impacto. E rapport ta amplio y ta inclui tambe observacion riba creacion di e parke marino cu mester yuda mitiga e impacto. Pero segun CARMABI, e cuater areanan designa no ta suficiente. Lo ilustra esaki den un siguiente publicacion.