No solamente a perde un area natural grandi pero simplemente a destrui otro parti di herencia cultural historico di Aruba. Esaki ta consecuencia di rosamento di un area natural enorme cu ta keda na Sero Alejandro, Savaneta, cu prome cu 2019 tabata cay den e asina yama buffer zone di Parke Nacional Arikok.

Museologo Lilly Peterson, cu ademas ta habitante di Savaneta a bisa cu e ta dificil pa mira con simplemente ta hiba un maneho di destruccion sin cu hende ta realisa kico ta bay perdi. Y netamente awor cu Gobierno ta papia di Sustainable Development Goals, SDGs, un compromiso cu Aruba a cera pa sigura sostenibilidad riba tur nivel.

Destruccion total

Peterson a invita Bon Dia Aruba pa tira un bista riba e pida tereno cu entre tanto ya no ta cay den e bufferzone di Parke Nacional Arikok. Esaki pa motibo cu den e proceso pa traha e Plan di Ordenanza Teritorial nobo, esta e ROP, a dicidi pa cambia e bufferzone pa otro funcion, esta cu e ta bira un zona ‘landelijk,’ un zona rural, unda ta permiti pa traha cas, pero cu mas espacio memey unda lo mester permiti naturalesa coexisti. Problema ta cu ya a rosa henter e tereno bay, sin laga mata atras y ademas a destrui henter e veld historico di aloë, cu ta parti di e herencia cultural di Aruba cu pa ley, lo mester keda preserva.

“Desde siman pasa tin rosamento di tereno grandi den nos delaster bufferzone di Aruba locual ta na Sero Alejandro na Savaneta. Hende cu ta biba na Sero Alejandro no sa ta kico ta pasando. Tin speculacion cu ta verkaveling pa construi cas,” Peterson a bisa Bon Dia Aruba.

Peterson, kende na December ultimo a presenta un plan na Gobierno pa un museo di aire liber pa ilustra e herencia cultural di e industria di aloë y agricultura en general, ta hopi preocupa pa e forma con ta andando cu e boco balornan cu ta keda na Aruba y cu a pesar di regulacion, toch tin destruccion ta sigui tuma luga.

“Mi a repasa e ROP 2019 liher y mi a haya diferente articulo cu ta contra di rosamento di nos naturalesa y herencia cultural di aloë,” Peterson a mustra

ROP lo mester a trece proteccion

E Plan di Ordenansa Teritorial, esta e Ruimtelijke Ordenings Plan, ROP ta dirigi specificamente pa evita cu tin destruccion di naturalesa y herencia cultural. Y veld di aloë ta parti di e herencia cultural di Aruba, segun e ciudadano. Como tal, e mes a bay controla den e ROP cua articulonan ta referi riba construccion di cas y a topa cu articulo 1.1 den e capitulo specifico, cu ta bisa cu e enfoke ta pa stimula construccion di cas na San Nicolas y Oranjestad, pero no ta menciona nada di Savaneta.

“Ademas, e ROP ta papia cu e construccion di cas mester tene cuenta cu balornan presente. Esaki basa riba e pensamento di ‘Build with Nature’,” e ciudadano preocupa e ilustra. “Pero manera tur hende por wak, a destrui henter e veld di aloë historico, sin laga algo atras.”

Ademas articulo 1.4 di e mesun capitulo ta trata di cuido, bienestar y deporte. Y aki e ROP ta bisa cu mester tin nucleonan di biba cu ta unico pa e area y reconocibel. Sinembargo e caracter unico di e area ta bay perdi’ ora cu ta rosa y yena seronan na Savaneta cu cas. “Un parti di e aspecto unico di e bario ta desaparece pa semper.”

Pero e ROP tambe ta papia di trafico y transporte y cu esakinan mester sirbi un bario. Den otro palabra, tur area residencial y facilidadnan mester ta ubica cerca di unda tin transporte publico. Sinembargo, dor di crea of permiti creacion di un nucleo di residencia den e seronan di Savaneta, ta stimula concentracion di trafico. “E area aki no ta ubica banda di unda tin transporte publico. Hendenan pues ta depende di nan mesun transporte, nan mesun auto. Esaki ta pone cu ta bin mas trafico y ta conduci na molester di zonido unda normalmente mester ta un zona keto.

Sostenibilidad

Espacio sostenibel ta nifica ‘extension pa expansion.’ Den otro palabra, haci uso di locual ta desaroya caba y no destrui naturalesa virgen. “Aki ta hopi cla cu ta trata di expansion. Lo mester a logra espacio duradero a base di e filosofia, of mas bien e instruccion di ‘Build with Nature’ cu ta traha cu naturalesa. Pero si mester mira cuanto tereno a rosa sin conserva sikiera un mata, e ta obvio cu a bay contra naturalesa,” Lilly Peterson a bisa.

Monumento y historia cultural

Pa e museologo, e articulo cu ta pisa hopi ta articulo 1.8 di e ROP, cu ta papia di Monumento y historia cultural. “Identidad di Aruba ta punto di salida pa calidad. Esey ta skirbi den nos ROP. Aruba cu su exportacion di resina di aloë a gana mercado global y ta motibo di hopi orguyo pa hopi Arubiano,” Peterson a ilustra. Prueba ta cu e mata di aloë ta riba e escudo di Aruba. “Den otro palabra, preservacion di nos veldnan di aloë ta pa nos un balor grandi.”

E refuerso di e caracter unico y reconocible di e nucleonan di vivienda ademas ta keda afecta pa e hecho cu a elimina un parti grandi di locual tabata e actividad economico di e area pa hopi tempo.

Build with Nature

Bon Dia Aruba a acerca tanto Direccion Naturalesa y Medio Ambiente, DNM cu ta e instancia cu segun su maneho mester duna conseho riba rosamento y con ta aplica e aspecto di Build with Nature. Segun e website di DNM, e maneho di BwN ta duna guia y instrumento pa organisa desaroyo riba Aruba na un forma duradero, unda ta proteha areanan di naturalesa di gran balor pa flora y fauna, cu tin un servicio na ecosistemanan. Crecemento di populacion di Aruba, y desaroyo incontrola di turismo, uso di tera y lama tur ta bay a costo di ecosistema y medio ambiente. Si mester prepara un tereno pa construccion sin ningun control, lo pone mas especie endemico bou presion y nan existencia ta bira cada biaha mas improbabel. Pero DNM mes ta conclui cu te ainda, ora di desaroya proyectonan no ta pone suficiente atencion na evaluacion di e efectonan pa medio ambiente ni tampoco e evaluacion ambiental strategico.

DIP ta duna aanlegvergunning, no DOW

Tambe a acerca DOW, pa motibo cu segun DNM na Bon Dia Aruba, ta DOW ta e instancia cu ta duna e asina yama aanlegvergunning cu ta e permiso pa desaroyadornan por rosa parti di terenonan grandi, sin cu ta destrui tur balor natural y cultural historico. No a acerca DIP, pa motibo cu e Director dr. Haime Croes te cu siman pasa ainda a bisa cu su departamento no ta bay duna ningun comentario riba casonan individual.

E realidad ta cu no a yega mucho leu. Pasobra DNM no a ricibi ningun peticion pa bay haci un analisis di e tereno, pa mira si tin matanan di balor natural halto y pa conseha di ki forma por rosa e tereno sin cu e ta haci e daño maximo, manera awor ta e caso. Bon Dia Aruba lo amplia riba e maneho aki, pasobra e plan tabata na 2019 caba pa tur instancia publico y esnan cu ta maneha ekipo pisa, haya curso riba kico ta BwN

Di su banda DOW a bisa nos redaccion cu contrario na e impresion di DNM, e aanlegvergunning no ta un competencia di e departamento, sino di DIP, despues cu haya conseho di DNM. Manera a indica caba, DIP no ta comenta riba casonan individual como tal ni DNM ni DOW por a bisa kico ta e consecuencianan pa e desaroyador pa rosa un tereno grandi sin tin e aanlegvergunning. Informacion cu Bon Dia Aruba a ricibi na ultimo momento ta cu DIP a duna e aanlegvergunning, pero atrobe, sin e analisis di DNM.

Lilly Peterson tabata kier a organisa un campaña grandi pa colecta firma pa protesta e rosamento, pero no tabatin tempo. “Asina mes mi a logra compila 125 firma den apenas algun ora, y mi kier entrega esaki hunto cu carta di protesta na DIP,” el a bisa Bon Dia Aruba.