Directiva di AHRA (Aruba Human Resource Association) ta organisa tur luna diferente charla pa nan miembro, caminda nan ta keda educa riba varios tereno di recurso humano.

Gabriella Helder, miembro di e directiva y Director di Educacion y labor, a splica tocante e cambio cu tereno recurso humano ta keda confronta. Tambe diferente liderazgo, diferente generacion cu ta keda traha cu nan.

Nan enfoke ta pa wak e cambio, pa asina keda mehora como miembro y obviamente riba e tereno di recurso humano. E directiva ta existiendo for di 1993 pa asina sigui yuda den area y ta conta cu 60 miembro.

Awendia tur compania tin un departamento di recurso humano. “Unabes bo tin 25 trahado den un compania, ya caba tin un HR. E ta un mundo grandi unda cu semper tin cambio. E rol di un HR ta pa e para neutral banda di e trahado y di organisacion, pero tambe pa wak e derecho y deber di trahado. Ta splica den e sentido eynan.”

Helder ta splica cu tur luna ta keda tene charla cu nan mesun miembro y hende cu ta acerca cu mag bin cu invitado. Esey ta duna nan e oportunidad pa crece como asociacion. Bon Dia Aruba a puntra Helder si awendia tin interes den hoben pa cuminsa un carera di HR. E ta bisa cu pa hoben cu no sa kico e trabou ta encera, ta un bon idea pa tene den futuro, pa organisacion pone nan HR por bay un scol y duna charla, asina por informa kico por spera di e tereno pafo. Pa sa mas tocante e directiva of kico nan ta haci, hende por acerca nan riba Facebook AHRA y nan lo contesta.

President Cavril Martijn Rombley di AHRA a bisa cu e invitado internacional, Dr. Shirley Davis, a duna seminario di ‘Changing the work force’ di futuro y impacto cu hende tin cu trece ‘e cambio ta sosodiendo den area di trabou na Aruba’.

E ta papia con pa siña deal cu tur e cambio. E ta duna desaroyo den e 5 generacion cu tin cu traha den e forsa laboral, por ehempel e generacion X, millenials, esun tradicional, etc. cu nan ta topa otro y con ‘abo como lider tin cu deal cu esey’.

Tin diferente caracter den area di trabou, caminda ta spera di nan manager. anto e HR tin cu deal cu esey. “E reto cu un lider na Aruba tin, nos como AHRA tin nos meta, nos herment. Nos ta duna training pa siña con pa deal cu tur reto y enfrenta esakinan, pasobra pa ta un lider no ta facil”, e ta splica, esaki pa motibo di diferencia di caracter.

Ta trece e tayernan aki di un forma interactivo pa siña con pa deal cu tur locual enfrenta den area di trabou. Segun Cavril, interes ta grandi, no solamente como HR pero manager y persona di tur edad.

Cavril ta bisa cu e cambio ta global, caminda mester siña di tur cambio, por ehempel den tecnologia, organisacion tin cu deal cune. “Tecnologia a tuma over. Esaki ta cambia con manera con un HR ta wak un persona via LinkedIn of haci entrevista riba Facetime. Esey ta haci cu e trabou ta cambia cu uzo di tecnologia mas lihe pa comunica cu hende.”

Dr. Shirley Davis, kende ta e persona cu a duna charla pa di dos biaha na Aruba, a splica tocante e cambio den area di trabou y kico kiermen pa un lider di organisacion por conoce su ‘conscience bias’, esta impacto cu nos tin ora di tuma decision y e efecto cu nos ta crea, cu por afecta e cliente.

Davis mes a cuminsa como HR, pero el a desaroya su mes den area di liderazgo. E conoce diferente topico. Pa prepara un HR pa yuda e lider pa ta cla y lidera cu varios generacion y habilidad caminda cu cosnan ta cambia cu tecnologia. Tambe ta anticipa cu cambio di strategia cu compania kier y ora un organisacion ta cla pa cultura y inclui un generacion nobo.

“E generacion nobo ta cambiando y ta haci nan habilidad mas competitivo. Pa motibo cu e cliente ta cambia awendia, nos mester traha hunto den nan diferencia. Pa nos crea un cultura cu ta pertenece, inclusion y high performance”, el a expresa.

Edmina Strickx, miembro di e hunta, tambe a comparti cu ta importante pa trece un persona cu por inspira otro na su manera di presenta y pa hende por compronde. Strickx ta bisa cu den un sala cu tin variedad di generacion ta importante pa nan siña asina ta evita problema y cosnan innecesario den area di trabou.

Pa locual ta trata prehuicio di mente, por determina con hende ta bay cu otro y con ta tuma decision. Pa esaki, ta duna splicacion den un tayer y con ta hinca pa haci un parti di teoria, unda cu grupo por discuti cierto tarea y despues bay central. A finalisa bisando cu tur luna nan tin un reunion general, unda nan ta scoge un speaker local.