E famia di sr. Koolman cu a fayece na Colombia lo bay entrega un carta di protesta na gobierno y parlamento. Bon Dia Aruba a papia cu e yiu Maritza cu ta conta un storia tragico unda segun e AZV y gobierno a laga e famia na caya.
Su tata un pensionado di 65 aña, M.A. Koolman, tabata un pashent di fybrose pulmonar. Famia Koolman a acerca AZV algun tempo atras pasobra e tata tabata kier un segundo opinion. Pero esaki a wordo nenga, segun Maritza. E famia a dicidi e ora pa riba nan propio esfuerso hiba sr. Koolman pa Bogota dia 28 di september anto biaha cu su mashin di oxigeno cu nan mes a huur. Algun minuut prome cu el a yega Bogota, e mashin su bateria a baha y despues cu a cambia e bateria sinembargo esaki no a traha. Sr. Koolman tabata falta oxigeno y a bira malo. Ora cu nan finalmente a yega Bogota y su tata a yega e hospital Engativa, Maritza ta conta cu nan a ricibi un trato inhumano. Hasta su persona a wordo saca for di Eerste Hulp.
Koolman no tabata den condicion pa biaha
Maritza ta conta Bon Dia Aruba cu e dokter cu a atende nan na Bogota a zundra y bisa cu dokternan di Aruba a comete eror. Pasobra su tata no tabata den condicion pa biaha. ”Desde inicio AZV no por a haci nada. Anto despues cu nos tabata na Colombia, nos a tuma contacto cu AZV y minister Schwengle (di Salud) kende a bisa cu nan no por haci nada pasobra mi tata a bay Colombia riba su mes.”
E famia a comunica cu sr. Schwengle kende ta un di su dokternan di pulmon pa pidi pa ayudo pero dokter Schwengle a bisa e ruman di Maritza cu e no lo yuda. Den desesperacion, e ruman a acerca prome minister Mike Eman cu a haci e promesa pa yuda nan y manda Air Ambulance pa busca su tata na Colombia. Pasobra su tata tabata no tabata den e condicion mas pa bula den un vuelo normal. Segun e famia Koolman e prome minister tambe a priminti pa cubri e gastonan.
Pero despues esaki no a sali di berdad, segun Maritza. “Schwengle a bisa cu loke Mike a bisa no ta berdad y nan lo wak pa yuda pero cu nos mester paga tur gasto bek. Nos a bisa ta oke nos lo paga tanten cu e yega prome cu ta laat.”
Bon Dia Aruba no a logra di haya un comentario for di minister Schwengle y tampoco di AZV riba e asunto aki. E minister ta informa nos cu pronto lo tene un conferencia di prensa pa aclaria e situacion.
Sin comunicacion
Maritza ta sigui conta cu dado momento su tata tabata bayendo mas atras y a haya un infarto.
Diadomingo 9 di october, despues di warda mas cu un siman riba reaccion di gobierno di Aruba, sr. Koolman a fayece su so na hospital. ”Nan no a laga nos pasa su ultimo momento cu ne. Pafo nos mester a keda. E hospital a tuma e curpa den confiscacion, bisa nos cu nan lo warda su curpa den morgue cual no a pasa tampoco. Pasobra nan no a ricibi reaccion di gobierno di Aruba. Dos dia despues hospital ta yama nos y bisa cu nos mester paga of Aruba mester yama pasobra mi tata su curpa ta den estado avansa di descomposicion.”
E curpa a wordo laga den un gang den e hospital pasobra hospital no a ricibi ningun pago pa por a hinca e curpa den un freezer. E meneer su curpa tabata den un estado di descomposicion avansa. Pa motibo cu e curpa di su tata tabata casi rementa den hospital, Maritza ta conta, nan a laga su persona hiba e curpa pa funeraria. Na final e unico cos cu haci tabata crem’e. E curpa a wordo crema diasabra ultimo dia 15 di october.
Embahada Hulandes
”Ni cuanto mi a roga y hasta mi a bay consulado Hulandes na Colombia y splica nan kico pa haci, y cu mi no tin caminda di keda, nan no a yuda.” E yiu di sr. Koolman ta splica Bon Dia Aruba cu cada dia gobierno ta bisa e proceso ta pega anto cu mester a warda. Unico cos cu nan tabata tene na cuenta cu ne y kier a sigura ta ken lo mester paga y debe bek. Ni mas cuanto el a yora y roga na consulado Hulandes, e unico cos cu nan por a yud’e cu ne ta un telefon pa e por a yama su famia y nada mas.
No tin hustificacion
Maritza kier pa henter pueblo di Aruba scucha e storia aki anto e ta desea pa ningun hende mester pasa den locual e mester a pasa aden mas. ”Nan ta bisa: oke pero bo tata a bay riba su mes anto ya. Kisas esey tabata su fout cu el a bay riba su mes pero ken por pensa kico ta bay pasa? Esey no ta hustifica cu bo ta lag’e pasa den locual el a pasa. Nos a pidi nan pa yud’e. Bo sa kico ta yega wak bo tata putri? Ami no ta haciendo politica of haciendo di mas pasobra ta pa AVP mi a vota. E hecho cu ora un Arubiano a sclama pa yudansa, boso a lag’e un banda. Mi no sa cu cua argumento e minister lo bin pasobra no tin hustificacion.”
Esaki no ta e unico caso
E caso lamentabel aki di famia Koolman no ta e unico caso cu ta conoci cu pa falta di negligencia, salud di un persona ta keda bay atras te ora ta bira mucho laat pa haci algo. Maritza. Koolman a skirbi riba su pagina di Facebook y haci un apelacion na esunnan cu tambe a pasa den un caso asina ki, pa skirbi e nomber di nan familiar, pa asina e laga e nomber hunto cu un flor dilanti di parlamento. Den e forma aki, e ta protesta pa y exigi gobierno un miho servicio medico pa e casonan aki no tuma luga mas. Bon Dia Aruba a tuma nota di varios hende cu mesora a skirbi nomber di nan sernan keri cu a pasa den e mesun situacion.
