“No ta un dia pa celebra.” Asina ta cuminsa e mensahe di presidente di e Sociedad Inter Americano di Prensa (SIP), María Elvira Domínguez, director di e diario El Pais di Colombia, riba Dia Mundial di Libertad di Prensa.
E frase, eligi cu astucia, a causa impacto y preocupacion, pero ta sirbi pa batia alarma principalmente di loke ta sucede den actualidad cu e libertad di prensa na Latino America, unda un biaha mas ta registra retroceso y e indicenan ta keda abou.
Detencion di periodistanan na Nicaragua, represion, censura y limitenan pa e derecho di manifesta contra e gobierno di Maduro, Daniel Ortega y di Miguel Diaz-Canel; asesinato di periodistanan (26 den ultimo aña, e mayoria di nan na Mexico, unda ta domina un sistema di proteccion di reportero deficiente absolutamente) corupcion, crimen organisa y delincuencia cu ta limita tur dia e labor periodistico; impunidad, estigmatisacion, Fake News y asfixia economico di medionan di comunicacion opositor, y restriccion pa acceso di informacion publico.
E lista ta continua y ta scur, un biaha mas, e Dia Mundial di Libertad di Prensa, fecha scogi pa UNESCO den conmemoracion di e Declaracion di Windhoek, un documento cu ta contene e principio fundamental di defensa di libertad di prensa, cu a ser redacta na 1991 durante un reunion di periodistanan Africano.
E atakenan contra prensa no tin consecuencia exclusivamente pa e mundo di comunicacion, sino tambe tin su corelato, e expertonan ta splica, cu calidad di democracia. “Ningun democracia ta completo sin acceso pa informacion transparente y fidedigno, cu ta e base clave pa crea institucion husto y imparcial, pa haci cu e lidernan ofrece cuenta y bisa e berdad pa autoridadnan”, António Guterres, secretario general di Nacionnan Uni, ta bisa riba e tema aki.
Di su parti, e organisacion Reporteros Sin Fronteras pa motibo di e fecha aki a publica un clasificacion mundial riba e libertad di prensa, cu un analisis di e situacion di 180 pais y teritorio, y atrobe, ta existi un alerta riba e riesgo y peligernan cu ta atravesa e practica periodistico y ademas e consecuencianan pa e democracia. 24% so di 180 pais y teritorio analisa ta registra un situacion “bon” of “manera bon” den e tema aki, mientras cu e aña pasa e porcentahe aki tabata di 26%.
