Ley ta cla pero Prome Ministro no kier ABB!
Manera a sali den publicidad den e dianan aki, Prome Ministro y su colega di Financia ta diferencia claramente di opinion riba e topico di introduccion di e ley di impuesto ABB. Mientras cu ministro Bermudez hasta ta duna di conoce cuanto e porcentahe ta bay ta (7%), Prome Ministro ta desmenti cu e ley lo bay pasa. Ken tin rason den esaki? Tur dos, na nan manera. Ministro Bermudez tin rason cu tin un proyecto di ley traha caba, unda ta menciona e 7% aki. Bon Dia Aruba ta dispone di copia di e proyecto di ley aki, inclusivo su Memorie van Toelichting. Tur cos cu ministro Bermudez a declara na prensa te awor, en berdad ta poni den e concepto aki.
Di otro banda, Prome Ministro tin rason como lider di e gabinete aki, cu tanten e no bay di acuerdo, e proyecto di ley aki lo no ni sali di oficina di Gobernacion pa yega Parlamento. Y si e declara awor cu no ta bay tin un ABB, esey ta final! Na ministro Bermudez pa saca su conclusion, si e ta keda traha den e cuadro legal di impuesto manera e ta awor, poniendo un banda tur plan pa ABB, cambio di impuesto pa vehiculo, etc. Den concepto di Premier Eman, nada ta cambia y ta sigui bay guera cu e instrumentonan cu tin awor.
Pero esey no ta splica tur e controversia aki. Pakico ministro Bermudez lo insisti si e tambe por sa cu Premier Eman no tin ningun gana di bay ehecuta un ley di impuesto di 7%, mientras cu el a gana dos eleccion cu su campaña contra un BBO di 3%, cu ademas na luga di kita esey, el a aumenta esaki pa 3,5% bao di otro capa (BAZV). Pasobra probablemente a palabra cu Hulanda caba cu lo bin un impuesto nobo, segun e ehemplo di e ABB di Bonaire, cu cual Bermudez tin experiencia y cu por conta cu aprobacion di gobierno di Reino. Nos no mester lubida cu nos ta bao curatela financiero caba y cu “the shots are called in The Hague”. Ademas e tono di e rapport di CAFT ta mustra cu ta tuma como un hecho caba cu lo tin un ABB pa 1 di januari 2016.
Por ta hasta cu e idea di bin cu un porcentahe mas halto di e ABB, cu ta haci posibel gara un 50 miyon extra for di pueblo pa beneficia gobierno, no ta bin for di seno di e partido na mando, sino di Hulanda. For di bon fuente nos ta comprende cu e calculacion di 7% di ABB ta basa riba un entrada ‘budget-neutral’, pero si mester trece aden 50 miyon florin extra, anto e lo bira mas di 8%. Tambe nos a comprende cu e ABB no lo bay reemplasa invoerrechten completamente, pero cu ta keda cierto categorianan mas halto, por ehemplo esunnan pa vehiculo lo keda mescos. Con tal cu henter e operacion aki no ta trece un berdadero simplificacion di e sistema duanero, impediendo un mayor eficiencia den e cuerpo aki.
Den e presupuesto actual no a tene cuenta ainda cu e entrada extra di ABB, pero ta conta cu entrada extra di cobranza di impuesto atrasa, cu no ta haya un splicacion debido, segun CAFT.
Si e ABB no sigui y no tin un bista real riba otro extra entrada, lo mester baha gasto, ya cu dificilmente Hulanda ta bay acepta cu mester fia extra riba mercado internacional, aumentando debe di Aruba mas ainda. Ademas esaki lo significa cu gobierno lo bandona su mes plan multi -anual pa yega na un presupuesto balansa na 2018. Ta esaki nos por lesa tambe den e rapport di CAFT, unda ta referi na e plan multi- anual di stabilisacion 2017 – 2020 nobo cu aparentemente ta existi caba, sin cu e ciudadano a haya esey pa mira. Tur cos ta indica, manera nos a comenta mas tempran den e siman aki, cu gobierno ta prepara pa pusha henter e asunto di presupuesto balansa den direccion di 2020, en todo caso te despues di eleccion di 2017, pa awor aki crea espacio pa sigui goberna den mesun estilo cu nos a mira den e ultimo seis aña. Di otro banda, ta parce cu gobierno di Hulanda ta insisti cu gobierno di Aruba mester mantene su mes na e cuadro financiero cu nan mes a crea y esey significa mantene e deficit pa otro aña na 2% di GDP.
Manera nos a comenta anteriormente caba, tur e elementonan t’ey pa un guera atrobe entre gobierno di Aruba y di Hulanda/Reino. Interesante lo ta pa haya sa si ministro Bermudez ta bay hiba un bataya su so, of e ta warda pa e bataya tuma luga entre Oranjestad y Den Haag. E desbentaha pa e ministro di Financia ta cu si e keda sinta, ta su presupuesto ta haya golpi na man Hulandes. Ora e ‘aanwijzing’ bin despues cu e presupuesto cana su caminda, ta su nomber y firma ta poni bao di e documento aki, pero no ta su gobierno ta na candela.
