(AP) —Diamars, Gobernador di Oklahoma, Kevin Stitt, a dirigi agencianan di estado pa uza definicionnan limita di “femenino” y “masculino” den e ultimo atake riba derecho transgenero den un estado cu caba tin ley contra uzo di baño publico, cuido medico y ekipo di deporte pa hendenan transgenero.
Stitt a firma e mandato ehecutivo apoya pa hende muhenan di e grupo anti-trans, Independent Women’s Voice, incluyendo Riley Gaines, un ex-landado di Universidad di Kentucky conoci pa su critica di un decision di NCAA permitiendo landado transgenero Lia Thomas pa competi contra dje den un careda campeonato pa hende muhe.
“Awe nos ta para contra e ideologia fuera di control cu ta destruyendo e fundeshi di nos sociedad,” Stitt a bisa. “Nos ta bay proteha e esencia di kico ta nifica ser un hende muhe.”
Ademas di rekeriendo agencianan di estado y directivanan pa defini e palabranan “femenino” y “masculino” pa coresponde cu e sexo di e persona cu cual el a nace, e mandato ehecutivo tambe ta inclui definicionnan pa e palabranan “homber,” “mucha homber,” “mucha muhe,” “tata” y “mama.” E mandato ta defini un persona femenino specificamente como “un persona di ken su sistema reproductivo biologico ta diseña pa produci ova” y un hende masculino como “un persona di ken su sistema reproductivo biologico ta diseña pa fertilisa e ova di un persona femenino.”
Esaki tambe ta dirigi scolnan y otro agencianan di estado pa uza e definicionnan aki ora nan ta colecta estadistica importante y tambe ta dirigi scolnan pa provee baño dedica pa mucha homber y mucha muhe so.
E mandato di Stitt, yama como “The Women’s Bill of Rights” pa su apoyadonan, ta e ultimo politica di Oklahoma pa ataca e derechonan di hendenan transgenero y ta parti di un trend creciendo den e estadonan conservativo. Stitt a firma e legislacion na comienso di aña cual a haci’e criminal pa un empleado di cuido medico provee cuido di afirmacion di genero pa muchanan menor di edad. Tambe el a firma pa medidanan cu ta prohibi (mucha) muhenan transgenero di hunga den teamnan di muhe y preveni muchanan transgenero di uza bañonan na scol cu no ta coresponde cu nan sexo.
“E mandato ehecutivo aki no ta di haber cu ni derechonan, ni e proteccion di hende muhe,” segun Nicole McAfee, director ehecutivo di Freedom Oklahoma, cual ta apoya e derechonan di hendenan transgenero. El a yama e mandato un “atake” cu ta codifica discriminacion contra hende muhe transgenero.
Lider Democratico di Cas, Cyndi Munson, a acusa e gobernador di uza “politicanan polarisador” pa asina sigui dividi ciudadanonan di e estado.
E accionnan di Stitt ta bin dilanti durante procesonan legal den Kansas tocante e definicion di un ley di estado cu legisladonan Republicano a yama “The Women’s Bill of Rights,” cual a infringui riba derechonan transgenero. Esaki tabata a base di lenguahe di gruponan anti-trans, incluyendo Independent Women’s Voice.
Stitt tambe a firma un mandato ehecutivo prohibiendo cualkier cambio riba e certificado di nacemento di un persona.
