Riba e isla aki keto bay ta existi cierto situacionnan, cu ta pone nos pensa si no ta posibel pa regla e asuntonan aki na un manera satisfactorio, y ‘de una vez por todas’.

Manera e caso di un mucha homber, cu ta aki indocumenta pa varios aña, ta caba Mavo, ta haya problema pa haya un diploma pa cual el a pasa examen, y na momento di otorga e persona su diploma mereci, algun otro persona ta kere cu lo ta bon idea pa stroba tur esaki, exigiendo un papel di Censo…

Ma bon, ta ken ta inventa e cosnan aki? Varios aña pasa nos tabatin e discusion caba tocante e manera corecto cu nos pais mester trata mucha cu ta indocumenta riba e isla. Laga nos cuminsa ariba atrobe, den e columna legal cu nos mester respeta.

Nos pais mester cumpli cu tratadonan internacional, entre nan esunnan cu ta stipula derecho di mucha. Articulo 28 di e Tratado encuanto Derecho di Mucha di Unicef ta formula e derecho riba educacion, bao di cualkier circunstancia. Esaki ta aplicabel tambe pa mucha cu ta indocumenta den un cierto pais. Den derecho internacional ta tuma como punto di salida pa asunto di persona cu ta indocumenta den un pais, cu esey basicamente ta responsabilidad di gobierno di e pais.

Ta abo como gobierno ta responsabel pa e situacion dentro di bo teritorio, tambe di e personanan indocumenta. Kico esey ta implica? Cu un gobierno por haci uzo di su facultadnan legal pa deporta o expulsa un persona. Naturalmente mester respeta e derechonan cu e persona indocumenta tin den e circunstancianan ey, pero finalmente si ta deseo di gobierno pa e no keda, e no ta keda. Esaki no ta e caso solamente di un mucha, sino di tur persona.

Tanten e persona indocumenta ta den bo teritorio, abo como gobierno di e teritorio ey ta responsabel. E caso clasico den e materia aki ta e persona di nacionalidad Venezolano, cu tabata traha riba tereno di e refineria, a cay di un stellage y a kibra su lomba. E no tabata sigura, y a keda mas di cinco luna den hospital, prome cu a hib’e su pais. Tur gasto tabata core pa Pais Aruba. Bueno, e dunado di trabao y e compania cu tabata opera e refineria tambe tabatin un responsabilidad den esaki, pero nunca a haya sa kico gobierno a logra cobra di e companianan envolvi.

Awor e problema specifico di e mucha. E ta den e pais, indocumenta, y tin of mayornan cu tin un status legal, of no. Den e caso cu e mayornan ta legalmente residencia, e mucha tin miho probabilidad di haya su residencia regla tambe. Si e mayornan tambe ta ilegal, e probabilidad ta mas grandi cu algun dia, ora e mayornan mester bay, e mucha ta bay cu nan. Pero tanten e ta riba nos teritorio, tanten cu e pais ta permiti estadia di e mayornan riba e teritorio, nos ta responsabel pa e mucha su derecho riba educacion ta respeta, y cu scolnan mester acepta un mucha ilegal, a pesar cu e no por produci un papel di cinco florin, pasobra claro cu e no ta registra na Censo.

Esey ta implica tambe cu e mucha no por produci un papel di Censo pa haya un diploma, pero, bon pregunta, ta con el a bay examen anto, e no mester a proba nada pa haya acceso na examen? Ta nos ta naïef, of no ta asina cu e papeleo ey mester ta regla pa bo haya acceso na examen, y keto bay den e caso di e mucha sin residencia oficial e situacion ta keda cu e tin derecho riba educacion, y riba e diploma, sino con e ta proba cu el a sigui enseñansa, cu exito ademas, si no ta dun’e un diploma pasobra e no tin residencia legal.

Ta p’esey tambe cu den e contexto aki nos no ta comprende e comentario den e corant aki, di e directora di un fundacion di enseñansa, cu añanan atras a dicidi cu un mucha ta haya acceso na scol solamente cu registracion oficial na Censo. Ta net esey ta en pugna cu e tratado menciona! Den e sentido aki nos no ta comprende e opinion di e directora, cu ta manda mayornan cu yiu indocumenta bay regla nan estadia oficial prome, pa despues nan bin inscribi nan yiu… Esey ta simplemente en pugna cu e tratado y nos leynan, pasobra mester cumpli cu leerplicht…

Awor, naturalmente un fundacion cu un cierto trasfondo religioso o filosofico no tin obligacion di acepta tur mucha; e criterionan normal di e base ideologico di e scol ta keda aplicabel, pero nenga a base di no ta residencia oficialmente, esey si no por. Asina un mucha di ken e mayornan por proba cu nan tin un cierto religion o filosofia di bida cu ta cuadra cu esun di e scol, e scol no por nenga sin mas a base di su status di residencia. Claro cu finalmente tin tambe scol publico cu ta acepta mucha di tur religion o sin religion. Nos por caba di regla e cos aki, pa semper?