Rino Hermans di Bureau Rampenbestrijding Aruba a ofrece un declaracion pa medionan local pa duna di conoce e incidente di derame di petroleo na refineria El Palito, Venezuela.
Pa cu esaki, Hermans a bisa cu desde 4 dia pasa nan a monitor e incidente aki, mirando e situacion na Venezuela cu no a wordo anuncia conforme e Tratado di Cartagena, tambe a tuma contacto cu agencia di Caribe cu di mesun forma tin cu reporta esaki pero tampoco a haya informacion, a wordo dicidi for di e momento aki pa tuma contacto cu Caracas pa haci investigacionnan.
Hermans a trece dilanti cu den dia di awe diahuebs na diferente rednan social a anuncia cu e derame di azeta lo yega na costa di Aruba, pa loke nan a constata cu e derame cu a tuma luga na Refineria ‘El Palito’ a keda conteni, ta lamentabel menciona cu e beachnan di Parke Nacional Morrocoy na Falcon a keda destrui, loke ta nifica cu ecologia maritimo y esun en general a haya un golpi duro cu e derame aki.
Expertonan di Venezuela y esunnan cu a haci e investigacion no ta mira cu e peliger di e derame lo por yega na islanan ABC, segun loke nan a ricibi di Caracas.
Hermans a bisa cu Bureau Rampenbestrijding ta keda monitoria e situacion y awe merdia den un contacto cu Kurswacht nan por a tira un bista durante nan patruya nan no a mira algo ‘cu no ta normal’ y si nan lo haya algo nan lo notifica e departamento aki.
