Un di e tankinan cu ta contene desperdicio di e refineria di mas grandi di Venezuela, Amuay, a bay over e siman aki y e material a yega te na e bahia banda di e refineria, manchando varios barco, asina dos trahador y un lider sindical a conta Reuters.
E derame for di e buraco na aire liber a sucede despues di dos dia di yobida fuerte y pa falta di mantenimento, asina e representante di e trahadornan,Iván Freites, a bisa dialuna tardi. E sindicalista ta un critico conoci di e politica di e empresa estatal Petroleos de Venezuela (PDVSA), cu ta opera tur refineria na e pais.
Freites a bisa cu e sucedido “te awor no ta cuantificable, pero por ta trata di como 200.000 bari di crudo. Tin barco atraca cu ta mancha,” el a agrega.
Dos trahador di e refineria, cu capacidad pa procesa 645.000 bari pa dia (bpd), cu a pidi pa no menciona nan nomber, a confirma e incidente.
“E FORS 1 (e tanki unda ta manda producto pisa fuera di specificacion o excedente) a desborda y tin barco mancha, loke a molestia varios capitan,” segun un di e trahadornan di Amuay.
Por lo general, tankernan mancha no ta permiti nabega den awanan internacional pasobra nan ta causa contaminacion. Ni PDVSA, ni ministerio di Petroleo a contesta di inmediato riba un solicitud di informacion.
Amuay, hunto cu su bisiña Cardón, ta forma e Centro di Refinacion Paraguana (CRP), cu te mita di october tabata opera na un tercio di nan capacidad pa motibo di e fayonan continuo, e falta di crudo pa procesa y e escasez di piesa pa haci mantenimento.
PDVSA ta bisa cu nan ta haciendo e inversionnan necesario pa mantene nan operacionnan y cu a menudo nan ta victima di sabotahe.
