Bon Dia Aruba a tuma contacto cu tur gremio concerni pa mira con a sigui cu e calamidad di derame di azeta na nos costa. Entre otro nos redaccion a puntra si e cambio den tempo pa via di tormenta a trece algun efecto of influencia pa e planificacion. Rampenbureau y Parke Arikok ta informa cu e situacion no ta categorisa manera un crisis mas, sin embargo monitor y limpiesa ta continua strategicamente.
Carl Quandt, Marketing Communications Manager na Parke Arikok ta conta Bon Dia Aruba cu diamars nan a ricibi e ultimo update hunto cu e ‘crisis team’ (Rampenbureau, DOW y otro autoridadnan envolvi) y a pone un stop na e ‘Oil Spill’ crisis. Segun sr. Quandt, esaki ta nifica cu e ta na un momento cu e no ta forma un crisis mas. “Cu esaki nos a habri tur e beachnan bek den parke, Conchi tambe ta habri bek pa publico y turistanan. Nos lo sigui cu trabaonan di limpiesa na e beachnan y costanan na Aruba pafo y dentro di Parke. Nos ta haci’e hunto cu e boluntarionan cu nos tin actualmente”, sr. Quandt ta splica nos. E ta agrega tambe cu ta keda vigente pa cualkier hende cu haya azeta riba nan curpa informa na mes con pa haci esaki limpi; cu azeta of habon. Si mira algun animal afecta cu azeta ta pidi pa mesora comunica cu Parke pa asina nan por avisa e autoridadnan corespondiente pa drenta den accion.
Rampenbureau
Rino Hermans, hefe suplente na Rampenbureau ta confirma na Bon Dia cu diamars nan a manda Arikok bek operacional y ta sigui awo cu ‘langdurige monitor’. Ultimo nos a informa cu lo mantene un accion di limpiesa y monitor te cu 20 di juli. Esaki ta bira uno ‘langdurige’ awo pasobra segun sr. Hermans: “Experiencia ta bisa bo cu 6/7 siman no ta suficiente, bo tin cu keda monitor pasobra bo no sa cuanto tin den e awa. Si yega asina leu cu por ehempel yega na tres luna cu no ta haya tarballs, e ora ta yega fin na e operacion akinan. Pa aworaki e ta keda uno langdurig.” Un biaha pa siman Directie Natuur en Milieu ta bin controla (riba dialuna) anto esaki ta conta pa DOW tambe cu ta pasa piki e sushi tur siman. E maneho cu tin actual ta cu riba diahuebs ta haci limpi y diabierna ta piki e sushinan. Entrante diamars cu a pasa Rampenbureau ta confirma cu tur cos a bira normal bek y a entrega un plan di accion nobo (langdurig monitor). E cambio den tempo no a haci ningun influencia na e planificacion manera nos ta compronde for di sr. Hermans. Segun e ta bisa Bon Dia Aruba, e strategia ta keda mescos.
Boluntarionan
Diadomingo ultimo un grupo di hoben boluntario a bay Boca Grandi cu Arikok parti mainta y Blue Blocks atardi. “Arikok ta comunicando mas cu nos pa e clean up di fin di siman anto piki saconan di tar cu nos ta colecta”, boluntario Christie ta bisa Bon Dia Aruba. E ta agrega cu “Na Boca Grandi nos a haya basta tar cu a sink den lama tambe cu ta manera preocupa mi.”
