Ta premira mas o menos tres luna mas di accion di limpiesa
Ainda e situacion di derame di azeta na nos costanan ta keda un calamidad. Segun Greg Peterson di Parke Nacional Arikok ta informa Bon Dia Aruba, diamars awo tin un otro reunion di e diferente gremionan cu ta encarga cu esaki. Mientrastanto e cooperacion pa cuminsa trece boluntarionan a cuminsa e fin di siman aki.
Segun sr. Peterson, ta premira sigur un tres luna mas cu mester sigui cu accion di limpiesa na nos costanan. “Locual ta cay riba e piedranan ta bay keda eynan pero locual ta bay den lama ta bay den e tera mes y contamina esaki. Cual lo por tuma algun generacion pa por drecha. Nos a experimenta e biaha aki cu gruponan boluntario. El a bay hopi bon y nos ta spera pa mira un grupo mas grandi siguiente fin di siman.”
E number pa yama si ta interesa di bira un boluntario ta 585 1234 na Parke Arikok Nacional kende ta grandemente aprecia cualkier ayudo cu por haya na momentonan aki. Diamars awo tur gremionan/departamentonan encarga cu e crisis aki lo bolbe topa pa un reunion. Ora cu tin un crisis, e team aki ta topa cu otro dos biaha pa siman pa evalua e trabao, tur otro punto necesario y kico tur mester haci, segun sr. Peterson.
Iniciativa di boluntarionan
Nos redaccion a tuma nota di algun hoben boluntario cu a dicidi di tuma accion. Nan a traha un ‘group chat’ den Whatsapp unda nan ta comunica cu otro pa yuda haci e costanan limpi.
“Nos a bay Andicuri anto tuma nota cu no tabata tin ningun hende haciendo limpi eynan pues nos a cuminsa haci loke nos por. Tur dia tin hende comunicando cu nos pa yuda y tin entre dos pa tres hende cu ta bin haci e costanan limpi”, boluntario Christie Mettes ta conta Bon Dia Aruba.
Sra. Mettes ta bisa cu nan a inverti casi 1000 florin den material caba riba nan mes. Nan ta busca handschoen largo, ora bay den area mas hundo nan ta bisti henter e paña special y masacra pa boca, depende e situacion. Nan a bay na e bocanan patras di Alto Vista, Boca Curason, Boca Cabay, Wariruri, Budui, Santana di cacho, Grapefield, rincon y ayera nan tabata fontein. “Unda nos scucha tin algo nos ta bay. Tur beach falta ainda pues no ta manera niun ta limpi awo.”
Strategia mas controla
Segun sr. Peterson, tin mas o menos cinco pa seis area rond Aruba cu ta basta contamina cu yen di mancha riba piedranan cu ainda ta eynan. “Expertonan no kier pa nos mishi cu esaki. Nan kier studia nan pa hende no bay haci e situacion mas pio cu e ta. Mayoria di biaha e spotnan aki mester laga nan eynan pa un tempo anto naturalesa cu solo ta kibra esaki.”
E ta sigui bisa nos cu expertonan di gobierno ta purbando di analisa si tin otro maneranan pa de contamina algun di e partinan aki pero no tin pura pa esaki, si pa e beachnan. “No por laga esaki zink den e santo. Pasobra manera esaki pasa lo mester haci hopi trabao. Hende ta wak esaki y ta keda frustra pasobra nan kier core yuda pero no tin manera pa haci e. Nos kier haci e den un strategia mas controla cu instruccion na kico exactamente pa haci y con pa deshaci di kico a piki.”
Sr. Peterson ta agrega cu ta bon cu hende kier haci esaki di bon curason pero mester tene cuenta pa haci e na un manera mas controla pa por transporta tambe e sushi na un luga special na refineria cu tin pa tira esaki afo. Pasobra si mester tira esaki por ehempel na dump, mester tene cuenta cu por contamina e area aki tambe despues.
