E fiesta cultural di San Juan (Juan Bautista) conoci den boca di pueblo manera Dera Gay ta data desde aña 1862 y ta wordo celebra tur aña riba 24 juni. E storia di e origen di e fiesta religioso y cultural aki conoce varios version.
E origen religioso ta relaciona cu fecha di nacemento di San Juan Bautista pero na mes momento e origen cultural ta mustra riba e fiesta di cosecha. Aunke tin un aspecto religioso, Dera Gay ta mas tanto conoci como un fiesta cultural cu entre otro musica, baile y canto. Colornan cu ta domina ta cora y geel. Geel ta simbolisa e palo di kibrahacha cu ta floria y cora como simbolo di candela cu ta cende riba e anochi prome pa anuncia e fiesta di e siguiente dia.
Segun tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela y pa asina cuminsa prepara pa e temporada nobo di cosecha. E cendemento di candela ta manera un limpiesa pa despues por cuminsa di nobo.
Dia 24 di juni, despues di bahada di solo, e fiesta di San juan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. E baile mas conoci ta esun di Dera Gay, unda e hende homber cu su wowo tapa y cu un palo den su man mester purba mata e gay. Antes e bailamento aki ta tuma luga den sabana cu un gay bibo dera. Awendia ta usa un gay traha y e baile ta den club. Esunnan cu sa baila ainda den sabana of riba veld di tera ta usa un calbas.
Tambe tin un baile di bandera, unda ta pone diferente banderin den suela y un persona cu wowo tapa cu lenso ta busca e banderinnan. E ceremonia ta wordo acompaña pa musica folklorico. E instrumentonan musical cu ta resalta ta fio, wiri y tambu. E cantica di Dera Gay mes ta data desde 1862. Locual no ta falta den e celebracion aki ta cuminda crioyo y bebida.
E fiesta di San Juan y Dera Gay a bira hopi popular atrobe despues di añanan setenta bou di poblacion local como tambe na e scol ta duna atencion na e fiesta popular aki.
