E cambio di e ley di impuesto riba vehiculonan di motor a drenta na vigor entrante di 2017. Asina departamento di impuesto por cobra bo un suma adicional si bo no ta cumpli cu bo pago. Si ainda no cumpli, por confisca pertenencia y of parti di salario. E prome termino ta caduca 31 di januari y no 15 februari mas.
Tambe bo no por paga mas den kwartaal, tin solamente dos termino, esun cu ta caduca na januari y e otro riba 30 di juni. Ayera vocero di Servicio di Impuesto di Aruba (SIA), Mervely Romano a duna informacion amplio riba e cambionan cu a wordo introduci den e ley di impuesto di vehiculo di motor. E cambio aki no a nifica un aumento riba e tarifa di e belasting aki.
Cobransa adicional te cu 100%
E persona tin e deber di paga e belasting aki na momento cu bo tin posesion di e auto, oficialmente ora cu e auto a wordo registra na bo nomber den e sistema di departamento di Impuesto. No ta importa si bo ta uzando e auto riba caretera publico of no, ya cu na momento cu e ta registra bou bo nomber bo tin cu paga e belasting aki, asina e vocero ta splica.
E sistema di cobransa adicional ta encera cu si un cliente no paga su belasting riba vehiculo di motor, e ora ey departamento di impuesto tin e autoridad pa bin cu un cobransa adicional pa e cliente ey. Kiermen un cliente por haya un cobransa adicional na momento cu e no a paga e belasting of e no a page completamente, pero tambe si e no ta page na tempo. Den un caso asina departamento di Impuesto tin e autoridad pa saca un cobransa adicional cu boet di maximo 100%. Sra. Romano a indica cu como e ta algo nobo ta bon pa cuminda ta na haltura di dje, pasobra den practica lo por tin cliente cu no ta worry pa bay paga e tipo di belasting aki na tempo y debidamente. Ya cu actualmente esun cu no ta page nan ta core e riesgo di haya un cobransa adicional cu ta inclui un boet di un maximo di 100%. Unabes cu un cliente di SIA ta haya un cobransa adicional, e tin un luna pa pag’e. E ta un termino relativamente corto. P’esey e ta sugeri pa no warda pa bay haya un cobransa adicional. Mester tene cuenta cu e termino of fecha di pago cu e ley ta prescribi y “cumpli cu ne pa evita e cobransa adicional aki cu ta nifica cu no solamente e cliente ta paga e belasting, pero di paga un boet posiblemente di 100% riba dje.”
Cuminsando suave
Sra. Romano ta indica cu den practica semper nan ta cuminsa mas suave posibel. “Gradualmente e proceso por bira mas severo depende con leu e cliente mes ta laga su asunto bay.” E ta papiando specificamente riba e cobransa di impuesto riba vehiculo di motor. Ta importante pa nos automobilistanan ta na altura cu aworaki, departamento di impuesto por bay mas leu pa den todo caso percura pa e placa por drenta manera ley ta prescribi. Tambe el a bisa cu e introduccion di e cambio di ley aki, e cliente tin derecho tambe pa entrega un carta di obhecion si acaso e bo ta di acuerdo cu un cobransa ricibi di e tipo aki. Nan no ta kere cu e sistema nobo di cobransa adicional ta bay subi na un scala grandi. Den e ley mes a keda introduci cu na momento cu persona ta bay haci traspaso di su auto pa otro persona, departamento di Impuesto no ta permiti esaki te ora cu e clientenan tin nan belasting di vehiculo di motor na ordo of up to date. Pero tambe pa otro tipo di belastingnan cu e por tin habri.
Termino di pago
Den añanan anterior mayoria di e clientenan por paga nan belasting den kwartaal, manera menciona awor esaki no ta posibel mas. Cu excepcion di e motociclista y esun cu tin plachi personalisa cu tabatin un termino di pago so. Tambe a keda introduci pa esnan cu no tin plachi tipo “A”, manera TX of V-car, nan tin cu paga e belasting den un solo biaha y nan deadline ta 31 di januari. Sinembargo sra. Romano ta laga sa cu recientemente e cambio di ley aki a caba di pasa y pa tal motibo, gerencia di departamento di impuesto a bay di acuerdo pa nan clientenan cu no tin e plachi “A” wordo permiti pa paga nan belasting den dos biaha durante 2017. E ta conta solamente pa esun cu ta bay paga e belasting di nan auto pa e aña aki.
“Esaki ta un maneho flexibel cu departamento di impuesto kier mantene aworaki nan mirando cu e ta un cambio nobo.” Pero pa aña 2018 e clientenan aki, entre nan e taxistanan mester paga full aña di belasting.
Druk caba
Nan ta ripara nan clientenan a capta cu e termino nobo di pago ta 31 di januari y no 15 di februari mas, ya cu nan sala ta yen tur dia durante e siman aki. Sra. Romano ta bisa cu nan ta den un periodo hopi druk ya cu nan tin alrededor di 74 mil number di vehiculo di motor registra. E ta pidi pa tene cuenta cu e dead line di 31 di januari awor y no warda te na ultimo. Nan tin e posibilidad di paga na Camacuri, MFA-Noord, MFA-Paradera, Oficina di Gobierno na Sta. Cruz, Savaneta y San Nicolas.
