Un di e preocupacion grandi cu mi ta haya canando den pueblo ta cu deporte a bira caro, no tin e recursonan personal pa asina provee e material necesario pa un hoben por practica su deporte debidamente. Diferente organisacion deportivo tambe ta vocifera cu nan no tin suficiente entrada pa por paga uzo di facilidadnan cu tin. No ta secreto publico cu situacion economico di hopi famia a bay atras y nan mester lucha y haci escogencia den nan financia personal pa asina logra cumpli cu nan debernan mensual. Lastimamente pero cu tur comprension e gasto pa nan yiunan eherce deporte ta bira e ultimo luga.
Cuminda, awa, luz, transporte, hypotheek,etc. ta come gran parti di nan entrada. Pa un famia di 4 bo mester di un entrada di mas o menos 4300 Florin y nos entrada minimo ta 1636.70 Florin. Un gran parti di nos pueblo ta biba bou di loke ta rekeri pa por biba. Plataforma E Forsa nobo ta reconoce esaki y ta trahando riba plannan pa asina ni e hoben ni nos grandinan wordo perhudica den su deporte y movecion. Structuralmente nos lo drenta tur bario y cu e fondonan disponibel drecha o traha facilidadnan cu lo por aloca tur hende den mas deporte posibel. Ta importante si nos kier combati criminalidad cu nos drenta e barionan bek.
Mester crea programanan na cualnan nos hubentud por tin accesibilidad na un costo minimo of liber. Mester incorpora por ehempel studiantenan cu a caba un estudio riba tereno di deporte manera CIOS den e programanan aki den bario. Mester crea e relacion di nobo cu universidadnan di deporte manera SpringfiledCollege na Merca cu antes tabata manda instructornan pa Aruba. Cuba tambe a colabora cu nos deporte door di manda ayudo tecnico. Den e barionan tambe mester bin programanan di movecion pa nos hendenan di edad pa asina yuda cu nan calidad di bida.
E fondonan disponibel pa cu deporte mester miho wordo uza na unda e pueblo deportivo por tin mas beneficio. Gobierno su tarea ta apoya y brinda nos hubentud e posibilidad concentrando riba deportenan cu ta atrae mas hoben posibel e.o. futbol, baseball, basketball y atletismo. E mucha mester lanta cu esentimento cu deporte ta sumamente importante pa su desaroyo personal y salud. Nos problemanan di obesidad y diabetes mester wordo confronta desde nan hubentud. Material pa e diferente deportenan mester wordo cumpra porta den grupo pa asina baha e costonan. Por papia cu distribuidornan local y e diferente federacionnan pa haci un pedido conhunto. Bin cu un forma di coop entre gobierno, scol y federacionnan na unda e material ta wordo regula y hiba na unda mas mester di dje y na un fraccion di e costo pa atleta. No por ta cu un mucha no por hunga futbol pasobra e no tin 200 Florin pa cumpra su sapato. Ban concentra riba nos hubentud y inverti mas den deporte den tur bario!
