‘Depolitiza’ gobernacion… Esey ta yuda…?

Un discusion cu a atrae nos atencion recientemente tabata esun cu a surgi entre un parlamentario – y ex-ministro – y nos Promer Ministro, entre otro tocante e facultadnan cu un ministro tin den e institucionnan pa cual e ta carga responsabilidad politico y, mes importante, kico e no por haci, pasobra esey no ta cay dentro di su autoridad. Un ehemplo cu a bin dilanti ta e caso unda ministro encarga cu enseñanza, cu lo ta mete di un manera no apropia den asunto di test escolar di acceso. E critica particular tabata cu e mandatario tabata busca forma pa logra un tipo di ‘herkansing’ pa un persona cu a faya su test regular caba y lo a acudi na e ministro pa mira si por logra algo ainda. E ministro lo a bay purba crea un test nobo, y den esey a ofrece colaboracion di personal di su propio despacho. Te aki mi ta comprende e pensamento ministerial, unda ta haya ciudadano preocupa na su despacho y ta averigua kico por haci. Seguidamente lo e topa cu e bareranan cu ta aplicable den e caso particular, y hopi biaha lo mester reconoce cu den cierto proceso mester laga e profesionalnan nombra haci nan trabao, loke sa sucede pero den e caso aki algo lo a bay robez y lo a sobrepasa e autoridad ministerial pa forza un solucion. En general por bisa cu no ta tarea ministerial pa interveni directamente den asunto di examen o test escolar, pasobra esey por habri paso pa un berdadero ‘can of worms’. Den reconocimento formal di diploma o certificado no conoce e factor ‘ministro’ pero ta hustamente necesario pa e mantene distancia.

Awor, no ta bay primeramente pa e detayenan di e caso particular aki, pero na inicio di un aña nobo ta bon pa reflexiona mas en general riba e tipo di asunto aki, ya cu nan tin un impacto grandi riba gobernacion y e forma corecto di, den cierto caso mantene distancia y den otro actua cu diligencia, hustamente pasobra e situacion ta exigi esey. Aki ta importante pa tin claridad encuanto e responsabilidad segun ley, unda hopi biaha tin un funcionario publico responsable pa ehecuta supervision y cumplimento cu e ley, loke ta encera facultad cu e ministro encarga cu e cartera ey, no tin. E ehemplo clasico ta di e ambtenaar cu ta encarga cu control di presencia di sangura, relaciona cu enfermedad transmisible, cu hasta por exigi y haya acceso na tur parti interior y exterior di bo propiedad, mientras su ministro no tin e autoridad ey.

Sin embargo, no den tur caso ta posible pa separa e responsabilidadnan di un manera asina. E asunto aki ta liga tambe na e tema di ‘mantene distancia’ loke riba varios tereno di maneho gubernamental ta hunga un papel importante. Por ehemplo, nos tin e caso di e entidadnan semi-estatal den cual gobierno, a traves di e ministro encarga, tin un posicion primordial, sea como accionista, principal o unico, o como e actor principal den nombramento di dirigencia y den maneho general. Hopi di e tipo di ‘solucion’ aki a surgi den un tempo cu tabatin presion fuerte riba nos gobierno(nan) pa pone e entidadnan aki ‘at arms’ length’, es decir na cierto distancia, sin intervencion den e maneho diario di e entidadnan. Esey, sigur den paisnan grandi, por funciona bon. Cerca nos, riba un isla chikito, e cosnan aki no ta traha asina, no pasobra e modelo no por funciona, pero e caracter particular di un comunidad chikito ta haci cu tur linea di comunicacion ta cortico y ta haci cu, si un mandatario mes no tin e voluntad pa crea un distancia funcional y sano, e ta converti su mes den un ‘micro-manager’ envez di ta un supervisor na nivel di maneho, cu absolutamente ta su asunto.

Awor, e problemanan di no mantene distancia debido no semper ta relaciona cu e incapacidad ministerial di maneha adecuadamente, sino ta relaciona tambe cu incapacidad gerencial den e entidad mes. Fuera di esey, den e ultimo decadanan nos por a mira hopi caso di sospecha, hustifica o no, cu e funcionario responsable no tin e confianza di e mandatario, loke hopi biaha tabata termina den corte. Afiliacion politico tabata hunga un papel den varios caso tambe. Ta bon noticia anto cu nos Promer Ministro a anuncia un maneho nobo di ‘depolitiza departamento’, asina percurando cu ta duna e funcionarionan responsable e espacio pa ehecuta nan trabao debidamente. Esey por yuda, unda te awor nos tabata mira cu e principio di ‘at arms’ length’ ta funciona, pero pa robez. Ora surgi problema pa cual e mandatario no kier carga responsabilidad, ta core bisa cu e entidad ta ‘autonomo’ y cu mester acudi cerca e dirigente concerni. Pero, ora ta conviniente politicamente pa forza un decision faborable, por mira cu e brasa pa mantene distancia ta bira masha cortico mes… Nos no ta asina sigur cu ‘depolitiza’ entidad y departamento ta yuda den esey.

Pa ta husto, mester bisa cu tin mas atencion pa e problemanan di maneho aki. Mas entidad ta hayando un codigo di ‘Good Corporate Governance’ segun cual nan mester opera. Esey ta bon, pero ainda a laga nos cu un problema: publico y medionan di comuicacion aparentemente no mag sa kico tin den e codigonan ey, mescos cu e cuentanan anual di mayoria di entidad, cu ta un secreto grandi. Ki dia nos por spera un cambio positivo den e aspecto aki di bon gobernacion? Si a ‘depolitiza’ of no, si no tin mas transparencia, nos no por ni constata si ta berdad.