Dependencia na un smartphone y e ora pa pidi ayudo

E diferente comportamento cu ta resulta di uso di smartphone ta ubica den un linea cu ta bay for di su uso necesario y controla, te hasta un adiccion of uso problematico, e cual ta supone e surgimento di ansiedad pa dependencia di e funcion di e dispositivo: rednan social, e-mail, internet, potretnan, yamada, videonan, weganan, entre otro.

Pa e motibo aki, no ta considera un “adiccion” na e dispositivo mes, sino na tur loke e ta contene y ta ofrece.

Segun un estudio publica na 2018 na Journal of Behavioral Adicttions efecto di smartphone riba e comportamento ta similar na un adiccion, aunke no ta cumpli cu e criterio pa consider’e asina.

Cuminsando cu e funcion di uso, smartphone ta ofrece identidad, status social, siguridad, informacion, entretenimento, gestion di tempo, etc. Cu ansiedad social (falta di socialisacion, sentimento di inferioridad y temor na soledad) personanan ta sigura nan mes na e dispositivo y ora ta sinti stress tin un efecto di “manta di siguridad”, cu ta reduci consecuencianan di stress negativo, mesun forma cu un mucha ta sconde bou un clechi pa protege su mes.

Esakinan ta comportamento di abuso di smartphone cu ta caracterisa pa dificultad di controla e impulso a pesar di e consecuencianan negativo como: problemanan den diferente area como sexual, familiar, educativo y hasta e riesgo di usel’e mientras ta stuur un auto, keda pendiente di dje gran parti di dia, stop di haci otro actividadnan, loke ta bira e smartphone como un obheto indispensabel.

Cu un smartphone personanan semper tin algo pa bisa mediante aplicacionnan, nan ta transmiti amor pa otro hende, pero ademas nan ta sconde di otro cu ta duna luga na un mal interpretacion ora ta duna like na un potret na amigonan of hende conoci, otronan ta gusta manda contenido mas erotico of manda mensahenan hot pa prepara e ambiente.

Rond di e dispositivonan, hopi pareha ta discuti pa falta di atencion, di comunicacion, pa separa cada otro di e presencia fisico, prome cu tur cos mester ta consciente di e problemanan cu ta ocasiona e uso sin medida y di e efectonan cu ta provoca pa su mes, no ta sirbi un hustificacion ora ta bisa cu “tur hende ta haci’e”, tin cu bira e parti general den un preocupacion y cu e pareha kier un solucion, cada ken ta asumi nan como parti di e problema y di nan lo depende e manera con pa regula e uso.

Manera ta conoci dependencia na smartphone ta nifica ansiedad, y aunke personanan no ta ripara, e necesidad di ta conecta, di haya contestanan lihe ora ta manda mensahenan, di conoce kico otro hende ta haci, di publica potretnan y ta pendiente di ken a duna un like, tur esey ta un muestra di un halto grado di ansiedad. Tin personanan cu tin mas cu un dispositivo cu e fin di tin un bida priva separa di nan trabou, sinembargo, e separacion ey no ta actua di e mesun manera cu celebro ya cu no ta diferencia un di otro.

Un denominacion cu ta birando conoci cada dia mas ta FOMO (fear of missing out) of “miedo di perde algo miho” ora e persona por medio di rednan social ta mira con bon su amigonan, pareha of famia ta disfruta, e realidad ta cu ta un sentimento di miedo, di inkietud cu e persona por sinti di keda afo di algun eventonan cu otronan ta disfruta.

FOMO ta un expresion di ansiedad cu ta aumenta e contenido den smartphone, di sa di biaha kico otronan ta haci, tambe ta influi den e bida di pareha, esaki ta liga na cambionan social y e necesidad di ekilibra espacionan personal cu esun cu ta wordo comparti, lo cual ta supone e caso di FOMO e imposibilidad pa haci’e.

Nomophobia ta e ansiedad intenso cu ta aparece ora e persona tin adiccion completo na un smartphone, personanan cu ta sufri di esaki semper ta atento di mantene e celular de su man, carga e baterianan, dispone di otro dispositivo por si acaso y drumi cu e celular cend’i cu e argumento cu algo urgente lo por sucede, en realidad ta otro forma di expresion di dependencia na e celular.

Phubbing (phone y snubbing) ta nifica ignora e otro persona mientras e ta ocupa cu e celular loke ta impedi pone atencion na esunnan cu ta hunto cune.

Ta existi tratamento pa esaki cu terapia di tipo cognitivo cu tin como obhetivo modifica e comportamento di consumo problematico, ademas ta implementa un serie di medidanan general como laga e dispositivo pa funcionnan esencial so, eliminando aplicacion di rednan social y otronan cu no ta necesario pa e trabou, educacion of relacion personal.

Tambe ta indica orario di uso y paga e celular ora ta bay drumi, si bien no ta existi tratamento cu medicina specifico pero por indica anti depresivo of pa stabilisa e animo pa trastorno relaciona cu depresion of ansiedad, ambos ta mas frecuente den e tipo di comportacion di dependencia.