Segun director di ANSA (Air Navigation Services Aruba), Nilknarf Kock, e inauguracion di un sistema di radar nobo ta e prome inversion clave cu e compania estatal nobo aki ta realisa pa atende cu trafico aereo for di toren di control. Esaki despues cu nan a wordo separa fei departamento di Aeronautica Civil y institui como un compania na aña 2015.

Prome cu esaki, e coalicion di gobierno AVP/OLA a bin cu un radar pa Aruba no sigui depende di Corsou riba control di nos trafico aereo. Sinembargo e inversion miyonario aki a bay perdi. E radar a bira obsoleto y no ta wordo uza mas basta aña caba. Ya caba ANSA N.V. a palabra cu Triple A (cu ta administra aeropuerto) pa desmantela e infrastructura di e radar bieu aki.

Cooperacion cu Corsou
Director di ANSA N.V ta haya cu e asunto di dependencia di Corsou riba e tereno aki ta un percepcion robes. E ta aclaria cu e relacion cu ta existi cu Corsou no ta uno di dependencia sino di cooperacion mutuo.

“Nos ta traha hunto cu Corsou. Esey hopi hende ta lubida”, segun e. E echo ta cu pa nan por drenta nos espacio aereo, e avion mester drenta na e espacio aereo di Corsou prome. E no ta wak esaki como un dependencia. Mas bien e ta haya cu mester mehora e coordinacion y comunicacion cu Corsou pa e operacion aereo por cana miho ainda.

Igualmente el a laga sa cu Aruba no ta paga Corsou nada pa niun servicio di control di trafico aereo. “Locual nos tin ta un acuerdo di cooperacion of letter of agreement, unda nan ta palabra con nos ta coordina e trafico aereo conhuntamente cu nan. Tambe e comunicacion y reglanan cu nan mester tene cuenta cu ne”, segun director di ANSA N.V.

Inversion
Sr. Kock a declara na Bon Dia Aruba cu e inversion aki di alrededor di 3 miyon florin ta haci Aruba hopi mas safe den nos trafico aereo. E echo cu nan por haci e inversion aki for di nan propio fondo no kiermen cu lo bira un extra peso pa locual e companianan aereo ta pagando actualmente. Sr. Kock a bisa cu ora cu nan a introduci nan sistema di cobransa entrante 1 di januari 2015, nan a papia cu e companianan aereo cu nan kier bin entre otro cu e sistema di radar aki pa bin cu un espacio aereo mas safe.

Cambio control trafico aereo
Normalmente nos controladonan aereo tabata traha sin cu nan por wak kico ta pasa den nos espacio aereo. Tur cos tabata a base di calculacion. Si pa ehempel e controlado ta duna e piloto un instruccion, si no por wak’e riba radar, bo no sa si e piloto berdaderamente a compronde e instruccion cu e controlado a dun’e. Pero tambe bo no sa si e piloto a sigui e instruccion di e controlado debidamente. “Aworaki danki na e radar e controlado tin un instrumento pa nan por verifica cu e avion ey ta unda bo ta kere cu e ta”, el a bisa.

Ademas di e aspecto di safe e uzo di radar ta ofrece e aspecto di eficiencia, ya cu haciendo uzo di e radar e separacion of punto di convergencia ta bira menos entre avionnan. Segun sr. Kock esaki ta crea pa e aerolineanan cu ta opera pa Aruba un margen di eficiencia mucho mas grandi.

Con druk nos espacio aereo ta? Segun director di ANSA N.V., nos ta keda un isla chikito pero nos trafico aereo ta hopi halto. No mester lubida cu Aruba ta un destinacion turistico hopi popular. Den e periodo halto te hasta e por yega na 130 pa 140 movemento aereo local pa dia. Esaki ta nifica cu como un isla of pais chikito di apenas 110 mil hende, nos trafico aereo ta druk compara cu otro paisnan cu un poblacion similar.

Na final sr. Kock a bisa cu e proyecto aki no ta uno exclusivamente di ANSA N.V. sino cu nan a hacie pa pueblo den general. P’esey e ta gradici y felicita nos pueblo pa e logro grandi y historico aki.