Depende con largo crisis di coronavirus lo dura: Te ainda situacion financiero di APA ta stabiel

E crisis di coronavirus/Covid-19 a touch tur compania financieramente y Aruba Port Authority (APA) como un N.V. no ta un excepcion.

Desde cu gobierno a bati alarma riba e dos prome casonan di e virus na Aruba, y posteriormente cu e ‘lockdown,’ tur operacion di APA cu tin di haci cu barco crucero, a keda suspendi te cu 26 di juni. E operacion cu nan ta atendiendo aworaki tin di haci cu barconan di carga pa abastece nos isla di diferente productonan.

Director di APA, Marc Figueroa a bisa cu pa despues di 26 di juni nan no a ricibi niun cancelacion di bishita di cruceronan na nos waf di Oranjestad. Sinembargo e no ta descarta cu esaki lo por sosode, mirando e situacion actual di e coronavirus mundialmente. E feedback cu nan ta hayando di nan stakeholder ta cu pa 2021 nan ta premira cu industria crucero ta cuminsa opera cu mas normalidad. Y esaki ta un bon señal.

Logicamente mirando cu operacion riba waf a mengua, esaki tin un impacto financiero pa APA. Segun director di APA, nan ta hibando un maneho di austeridad, caminda nan mester corta nan gastonan. El a bisa cu tur loke no ta prioridad a wordo poni na banda te un proximo aviso.

E tabata hopi cauteloso riba e parto finaciero di e compania, pero Figueroa a indica cu te na momento aki APA ta den un posicion stabiel. “E no ta e miho situacion cu nos por ta aden, pero e ta OK,” el a bisa.

Sinembargo e ta haya cu nos ta bringando cu un virus cu bo no sa na unda e ta, ken tin’e y ken no tin’e, y esey ta e problema. P’esey e ta haya importante cu awor cu nos a drenta den e prome nivel di flexibilisacion, pa e hendenan tene nan mes na e exigencianan di e shelter in place y distanciamento social. Ya cu e crisis di coronavirus tin un impacto grandi riba nos economia.

E impacto aki no ta solamente riba APA sino riba full Aruba su economia. Esaki ta e incertidumbre cu tin, ya cu si bo sa un fecha specifico, bo por haci e planificacion debidamente. Pero te ainda bo no sa ki dia e ta caba, y tanten bo no tin un cura of vacuna, nos tin cu bay siña con pa convivi cu e virus aki.

Industria crucero

E feedback cu APA ta hayando di nan stakeholder ta cu pa 2021 nan ta premira cu industria crucero ta cuminsa opera cu mas normalidad. Figueroa a agrega cu esaki ta pas cu varios di e reservacion cu tabatin pa 2020, nan a wordo hala pa e siguiente aña. Tur esaki ta un bon señal ya cu e cantidad di reservacion lo ta basta halto pa 2021.

Segun director di APA e tipo di reservacion aki ta crea un panorama mas positivo y e ta crea un sentimento di confiansa. Ya cu tambe por a existi e opcion di no bin cu crucero bek te cu cierto tempo. Pero e companianan di crucero ta mustra cu pa otro aña nan ta interesa pa bin Aruba.

Mientras cu e parti operacional di barco di carga ta sigui normal, teniendo cuenta cu tur medidanan di higiena y bio-siguridad pa evita e contagio di Covid-19. Aunke si actualmente e parti di carga ta draai cu un cantidad menos. Un factor tin di haci cu e sector hotelero ta cera. Te na e momento aki -segun director di APA- no tin niun indicacion cu e parti di carga ta bay stop. “Con cu bay bin nos tin cu sigui produci y come,” el a bisa.