Dolarisacion y aumento edad di pensioen ta keda forma parti di e landspakket

Hulanda no ta deshaci di e pensamento cu mester studia e posibilidad pa introduci dollar como moneda di pago na Aruba, en bes di florin. Esaki ta para den e agenda di ehecucion di e landspakket. E agenda ta conta di Juli pa fin di September.

E posibilidad di dolarisacion ta parti di e reforma di e sector financiero, cu tin como meta pa realisa un sector stabiel cu por cumpli cu su papel pa sostene economia real na un bon forma. Pero tambe lo mester bin regulacion adecuado riba e sector unda tin supervision riba implementacion di e reglanan, ademas cu mester yega na un supervisor cu por actua na tempo y determina ora cu tin problema na empresanan financiero.

E tema di dolarisacion ta keda den e landspakket pero mester haci investigacion prome riba e costo di comunidad pa carga su propio moneda versus e dollar. E investigacion aki lo mester sosode door di un partido independiente externo. A base di e resultadonan lo determina e medidanan y un decision riba e structura monetario desea. Pero esaki lo no sosode prome cu 2022.

Structura di Garantia di Deposito

Locual lo tuma luga ta modernisacion di e fayonan den ley y reglanan, unda sigur lo introduci e Structura di Garantia di Deposito, DGS y modernisacion di e cuadro legal di resolucion. E revision lo ta pa determina cua ley mester keda adapta, despues pa su implementacion. Un aspecto importante ta pa percura cu e leynan ta fortifica esfuersonan pa evita labamento di placa y financiamento di terorismo. E ley DGS lo mester ta cla pa 1 di October 2021, depende di e trayecto di conseho, incluso di Raad van Advies. E decreto nacional mes lo mester ta cla 1 di Februari 2022, un biaha mas pendiente e proceso parlamentario y e trayecto di conseho.

Reforma economico

Meta di reforma economico ta realisacion di un economia cu ta resiliente, dinamico y cu por absorba shock externo, y tambe pa yega na un structura di siguridad social fuerte y pagabel cu ta pone e estimulonan riba e luganan debido.

E investigacion mester a tuma luga caba, pero a conoce retraso pa motibo di proceduranan di banda di Hulanda.

E maneho di mercado laboral lo keda analisa, y ta bay introduci ley y regla nobo pa modernisa esaki. Medidanan manera reduccion di cantidad di ora di trabou, trabou part-time, contract pa periodo determina, flexibilisacion di e ley di retiro, kita estorbonan pa tuma trahado di exterior den servicio, uso di trahado sin permiso y desempleo hubenil ta parti di e analisis, cu a keda posponi. E rapport final sinembargo mester ta cla pa prome di Maart 2022.

Plan di accion contra economia informal

A base di investigacion lo por haya bista di e grandura di economia informal y por tuma medidanan contra esaki, mescos ta conta pasonan contra trabou ilegal. Pa 15 di October mester tin un inventarisacion di tur investigacion existente, mientras cu pa 1 di December lo mester tin un mapa di tur e problemanan den e infrastructura di informacion y intercambio di data. Pa 15 di Januari 2022, Hulanda y Aruba lo mester tin e plan di accion integral y multianual cla cu ta dirigi pa realisa un economia resiliente.

Edad di pensioen por subi na 66

Pa Maart 1, 2022 mester tin un rapport cla riba e structura di siguridad social, pa trece e cambionan cu segun e landspakket ta necesario. En todo caso, ta sali di e punto di bista cu e edad di pensioen mester bay na 66 na 2025, alomenos cu investigacionnan mustra cu esaki no ta realistico y cu tin alternativanan cu e mesun efecto presupuestario. Un instituto economico independiente nombra pa COHO, den consulta cu Aruba, lo por riba papel kico ta e efectonan presupuestario pa percura cu pensionnan ta keda pagabel y con e siguridad social lo ta si e edad di pensioen subi pa 66, y eventualmente lo por sigui subi basa riba expectativa di bida. Preparacion pa e topico aki lo bira mas concreto den e siguiente agenda di ehecucion.

Elimina burocracia

Lo optimalisa structura di permiso, baha costo pa haci negoshi y elimina burocracia pa promove empresario y clima di inversion. Pero pa logra esaki mester revisa tur e leynan relevante y e resultado mester ta cla pa 1 di December 2021. Digitalisacion tambe ta esencial y e servicio y departamentonan crucial mester ta completamente digitalisa pa 1 di Februari 2022.

E reglanan di e Plan di Ordenanza Teritorial mester ta aproba pa 30 di September 2021, mientras cu Hulanda y Aruba lo mira con pa mehora e funcionamento di departamento di legislacion y asuntonan huridico pa percura cu tur e proceso legal por cana bon.

Mientrastanto, a cumpli cu e punto acorda cu Aruba ta tuma encargo di e paketenan di cuminda cu Hulanda tabata manda pa Cruz Cora. E programa financia pa Aruba mes a cuminza dia 1 di Juli ultimo.