Departamentonan di gobierno ‘no tin pura’ cu presupuesto 2016

ORANJESTAD – Faltando cuater siman pa 15 di december 2015, y un siman despues cu e ‘mester’ a drenta parlamento pa tratamento, no tin ningun señal di e presupuesto 2016 ainda. Fuentenan fidedigno di NoticiaCla.com ta confirma cu ‘departamentonan di gobierno, -cu excepcion di ministerio di finanzas-, cu ta prepara e presupuesto, aparentemente no tin pura’. Ora cu NoticiaCla.com a puntra den seno di parlamento pa e presupuesto, e contesta cu a haya ta cu ‘gobierno ta laat cu esey’, refiriendo na e presupuesto. Loke no ta yuda e situacion ta cu awe NoticiaCla.com a haya confirmacion tambe cu e ultimo dia cu parlamento ta traha (y cu tin chens pa trata e presupuesto) ta diabierna 18 di december proximo. Despues di e fecha ey, parlamento ta baha cu reces te proximo aña.

TIN CU CUMPLI CU LEY DI AFT

Motibo cu tur esaki por bira problema, ta debi cu contrario na añanan anterior, awor tin e ley cu parlamento mes a pasa fin di augustus, cu ta stipula e fecha riba cual e presupuesto mester keda ‘entrega’ na CAFT. Pues esey ta nifica de hecho cu prome cu 15 di december e ley mester ta ‘aproba’ pa parlamento, y ‘firma’ pa gobernador pa por cumpli cu e parti unda cu ta ‘entrega’ esaki na e colegio manera stipula pa e ley. Si esaki no sosode pa e fecha ey, -of un termino ‘rasonabel’-, College Aruba Financieel Toezicht (CAFT) ta notifica gobierno di Reino riba esaki. Y si tene cuenta cu pa 18 di december no ta trata nada mas den parlamento, e fecha ‘rasonabel’ rapidamente ta bira un problema, segun informacion cu NoticiaCla.com tin serca di esnan envolvi den e proceso. Y e proceso cu ta sigui, ta stipula ciudadosamente den articulo 13 di e ley bou di cual e colegio di supervision ta opera, esta LAFT. Esaki ta stipula entre otro na inciso 3, cu CAFT por actua y manda notifica gobierno di Reino di e ‘incumplimento aki. “Un notificacion manera esun di inciso 1 (stipulacion cu ta papia di cumplimento cu e fecha di 15 di december), por bay acompaña pa un conseho motiva pa e dunamento di un ‘instruccion’ (aanwijzing) na conseho di minister, pa ainda prepara un presupuesto na e colegio menciona.’ gobierno di Reino por usa instrumentonan na su poder pa enforsa pais Aruba, cu por nifica cu lo por cay aden manera cu a haci den pasado.

DEADLINA PA RICIBI PRESUPUESTO PA 15 DI NOVEMBER

Cu esaki na bista, no tabata mucho tempo pasa cu presidente di parlamento Marisol Lopez Tromp,-cu a manda cartanan pa gobierno informando nan-, cu teniendo cuenta cu e protocol y pa por duna parlamento suficiente tempo pa prepara su mes pa e presupuesto, e presupuesto mester ta na parlamento pa 15 di november mas tarda. E fecha ey a pasa un siman pasa, y te ainda no tin nada di presupuesto. Eventualmente e presupuesto por drenta mas laat, y eventualmente ‘por’ pasa e presupuesto prome cu 15 di december, pero parlamento lo tin menos tempo pa prepara nan mes. Di otro banda, Lopez a bisa tambe cu esey no kier men cu lo pas’e tambe pa e fecha ey, pas’e loke pas’e. Esey ta pone gobierno den un posicion dificil, pasobra si e no pasa pa e fecha ey, nan por haya nan mes den falta di ‘cumplimento’ atrobe.

RAAD VAN ADVIES

Mes momento, gobierno no tin e control di e proceso aworaki, mirando cu e presupuesto ta den man di Raad van Advies. E organo consultativo, te cu awe ainda no tabata cla cu esaki y no a pasa esaki bek pa gobierno. No por a haya un confirmacion di e organo ki dia nan ta planea pa keda cla cu esaki. Loke si NoticiaCla.com tin confirmacion ariba, ta cu RvA tin e presupuesto 2 siman. No sa cuanto tempo mas nan mester pa por keda cla cu esaki, aunke a compronde e tempo ey cu esaki por a dura por lo menos un luna, cu ta nifica prome siman di december (otro siman). Pues tin e posibilidad cu pa otro siman e presupuesto por keda cla cu esaki. Si esey ta suficiente tempo pa keda cla pa parlamento trata esaki, te pa CAFT haye den su man prome, of mas tarda, 15 di december ta keda e pregunta grandi. NoticiaCla.com a compronde cu den seno di gobierno tin hopi cu ta coriendo cabez di gay pa keda cla, mientras cu otronan no tabata echt ‘coopera’ pa e keda cla na tempo. 

Source: Noticia Cla