Departamento Meteorologico a emiti un alerta pa biento duro cu ta drenta na vigor pa awe 6or di mainta. Un aviso pa doñonan di boto chikito pa tene cautela riba lama habri, specialmente den areanan cerca di costa oost te noordwest, ta keda na vigor te proximo aviso.
Departamento Meteorologico a splica cu diferencianan di presion den region di Caribe ta birando mas grandi y esaki lo haci cu biento lo bay supla un poco mas duro durante proximo dianan. Ta spera velocidad di biento di 23 te 27 nudo y ta anticipa cu lo por tin rafaga cu de vez en cuando lo por yega 35 nudo (Beaufort 8). Esaki lo haci cu lama tambe lo bira bruto na cierto partinan, cu olanan di 7 pa 8 te posiblemente 9 pia, specialmente na partinan oost te noordwest di costa y lama habri.
Como accion di precaucion, ta pidi usuarionan di facilidadnan di lama pa tene cuenta cu e biento duro, specialmente marineronan ta wordo urgi pa tene cautela riba lama habri y cerca di costa, ya cu e biento duro lo bay causa lama localmente bastante bruto.
