Departamento Medio Ambiente ta bay investiga ‘boormento’ na Isla di Oro

Fundacion Aruba Birdlife Conservation a publica ayera imagen di locual nan mes ta bisa actividadnan di ‘drilling’ pa investiga den cuadro di e construccion di un hotel na Isla di Oro. Bon Dia Aruba a acerca Departamento di Medio Ambiente cu ta indica cu nan no ta na altura pero lo bay investiga e asunto.

E fundacion ta indica cu e trabou a cuminsa diamars. E compania su tras ta studiando e e consistencia di e tera na e tereno pa determina con miho nan por fortifica e fundeshi di e edificionan cu nan kier construi. Pero nos no a logra di confirma esaki na e compania mes cu ta tras di e proyecto di The Zoetry Isla di Oro Aruba

Bon Dia Aruba tampoco a logra haya un reaccion for di Departamento di Infrastructura y Planificacion DIP ni DOW en cuanto ta e ultimo desaroyonan aki. E noticia di construccion di un hotel na Isla di Oro no ta algo nobo y manera nos a skirbi mayoria di organisacionnan ambiental ta contra e proyecto aki.

No tin keho oficial

Bon Dia Aruba a acerca Director di Departamento di Naturalesa & Medio Ambiente, Gisbert Boekhoudt cu algun pregunta kende ta bisa cu: ”Nos sa cu tin interes den Isla di Oro, pero nos no ta na altura cu hendenan a haya un ‘okay’ pa bay drenta den e luga pa coba of hala cosnan, nos no sa.

Sr. Boekhoudt ta bisa si cu esaki awor ta den interes di Departamento di Naturalesa y Medio Ambiente pa bay check y wak kico exactamente ta tumando luga, sinembargo, esaki por bay mas directo si un keho oficial drenta cerca nan mes y no via media.

Departamento di Naturalesa y Medio ambiente solamente tin e autoridad pa evalua kico e impacto di cierto tipo di construccion den areanan di naturalesa ta, mirando cu otro responsabilidadnan en cuanto ta otorgacion di permiso pa construi of mishi cu algo den tereno publico ta cay bao di otro departamentonan. Sr. Boekhoudt ta bisa cu generalmente, ora hende drenta den un area natural e ta hustamente pa haci mas cos riba dje y causa cu e naturalesa ta bay atras. ”Una bes hende drenta den un area natural, e tendencia no ta pa cuid’e, pero hustamente haci cosnan sin tene cuenta cu e especie cu ta biba eynan of den e caso di Isla di Oro, e ta un area hopi particular y unico como e area mas grandi di mangel cu nos tin. Unabes cu bo bay construi eyden, tin cierto cosnan cu bo mester tuma na cuenta cu ne. Pa e ta accesibel, pa  e hendenan cu ta bin, local y turista cu ta exigi un standard halto.”

Necesidad mas halto pa conserva Isla di Oro

Segun Sr. Boekhoudt, no ta importa kico ta e intencion pa trece na Isla di Oro, sea e ta un otro nightclub of un hotel, mester tin diferente cosnan cu mester wordo saca, kita y drecha dependiendo na kico mester wordo haci, teniendo na cuenta cu e naturalesa.

Gobierno ainda ta procesando e peticion di parlamento pa conserva e 16 areanan di naturalesa cu mester bira parti di Parke Nacional Arikok. Sr. Boekhoudt ta agrega cu Isla di Oro ta cay bao di e 16 areanan protegi aki anto cu e ta score hopi halto en locual ta necesidad di conservacion. ”Nos ta traha basa riba cosnan cientifico. Tur e areanan ta haya un score a base di parameternan ecologico, anto Isla di Oro ta un area cu a score mas halto. Tin otro areanan tambe cu ta score e ‘total score’ of well e 100% den score en cuanto necesidad di conservacion. Nos ta buscando un manera pa proteha e area aki. Pues si ta bay tin inversionnan pa otro cosnan, ta bay eigenlijk contrario na e tarea cu nos a ricibi. Nos mester check e detayenan pa nos por sigui pa mira den cua rumbo e cos aki ta bay.”